Në kuadër të operacionit të fundit kundër trafikut të drogës, ku janë të përfshirë edhe shtetas shqiptarë, Europol ka arrestuar në Belgjikë atë që njihet si kreu i kartelit të drogës. Në fillim mediat greke e prezantuan atë si Dhimitër Poti, një 50-vjeçar shqiptar, që jetonte në Belgjikë dhe njihej me pseudonimin Valter.
Ai kishte rol kyç në organizatën e trafikut të drogës, ku bën pjesë edhe Klement Balili. Dhimitër Poti ose Valteri që jetonte në Belgjikë, kujdesej për trafikimin e drogës në vendet e Europës Perëndimore, dhe lehtësonte aktivitetin e grupit.
Por së fundi mësohet se ai këtë emër e ka marrë më vonë gjatë qëndrimit në Greqi, ndërsa në fakt quhet Gëzim Poti dhe bashkë me të është arrestuar edhe i vëllai Xhevahir, të dy nga Kukësi dhe jo nga Saranda, siç ishte shkruar në dokumentet e tyre. Europol konfirmoi arrestimin e 17 personave, ndër të cilët 11 shtetas grekë dhe 6 shqiptarë si pjesëtarë të grupit kriminal të organizuar, të përfshirë në trafik droge.
“Rrjeti ishte përqendruar kryesisht në Greqi dhe dyshohet se ka fituar qindra miliona euro nga trafiku me anije i lëndëve narkotike në disa vende evropiane. Nga operacioni i përbashkët i Greqisë dhe Belgjikës janë sekuestruar dhe 698 kg kanabis në Greqi dhe 96.5 kg hashash në Belgjikë” njofton Europol, që saktëson se priten dhe arrestime te tjera.
Ndërkaq policia ushtroi kontroll në banesën e Klement Balilit, i akuzuari nga policia greke për kontrollin e transportit të drogës nga Saranda në Greqi. Gjatë kontrollit, në fshatin Stjar të Delvinës, policia nuk e ka gjetur Balilin në banesë, ndërsa familjarët thanë për News24 se nuk kanë dijeni për vendndodhjen e tij.
BW/d.i.
