Përmes një letre dërguar kryetarit të Kuvendit, deputetja e PS-së Valentina Leskaj i ka kërkuar Ilir Metës që mandati i saj të shkojë në Gjykatën Kushtetuese.
Vendimi vjen pas akuzave të opozitës për përfitimin e fondeve publike nga ana e djemve të nënkryetares Leskaj.
Letra e deputetes socialiste vjen në kohën kur opozita ka vendosur për të bllokuar punimet e parlamentit, duke vënë si kusht për bashkëpunimin në reformën në drejtësi, pikërisht dërgimin e mandateve të Leskajt dhe deputetit tjetër socialist Rakip Suli.
Po sipas Partisë Demokratike, djali i Valentina Leskaj ka përfituar një konçension për hekurudhën Ballsh Fier Vlorë, kontratë kjo që zgjat 25 vite dhe që sipas opozitës është në kundërshtim me ligjin për konfliktin e interesit. Ligji në fjalë ndalon personat e veshur me pushtetin e deputetit si dhe të afërmit e tyre që të lidhin kontrata me institucionet publike të vendit.
“Asnjë individ, kur ky njësohet me një zyrtar në njërin nga funksionet e përcaktuara nga ligji (ku përfshihet edhe deputeti), nuk mund të lidhë kontratë apo nënkontratë me asnjë institucion publik’.
Ndërkohë pika 3 e nenit 24 parashikon se:
“Ndalimet dhe kufizimet për zyrtarin zbatohen edhe për personat e lidhur me të, ku sipas ligjit përfshihet edhe fëmija në moshë madhore (pika 1 e nenit 24)”.
