Shqetësimet rreth efikasitetit të vaksinës së zhvilluar nga Universiteti i Oksfordit / AstraZeneca tek të moshuarit mund të bëjnë që grup mosha të ndryshme të marrin vaksina të ndryshme.
Ekspertët britanikë thanë javën e kaluar se vaksina kishte një efikasitet prej 70% në përgjithësi. Për shumicën e pjesëmarrësve në provat klinike, efikasiteti ishte 62%, por për 3,000 pjesëmarrës që gabimisht u ishte dhënë gjysmë doze, efikasiteti ishte 90%. Asnjë pjesëmarrës, pavarësisht nga sasia e dozës së vaksinës nuk shfaqi simptoma të rënda ose u shtrua në spital.
Rregullatorët kishin thënë më parë se do të miratonin një vaksinë që parandalon Covid ose zvogëlon ashpërsinë e sëmundjes në të paktën 50%.
Rezultatet e Universitetit të Oksfordit / AstraZeneca shkaktuan shumë entuziazëm, pasi efikasiteti prej 90% rivalizonte ato të vaksinave nga Moderna dhe Pfizer / BioNTech.
Ndryshe nga rivalët e saj, vaksina e Oksfordit është e lirë për t’u prodhuar dhe nuk ka nevojë të ruhet në temperatura shumë të ftohta. Ajo gjithashtu pritet të prodhojë 355 milion doza vaksine brenda pak javësh.
Sidoqoftë, grupi që mori dozën e ulët të vaksinës së Universitetit të Oksfordit / AstraZeneca nuk përfshinte asnjë pjesëmarrës mbi moshën 55 vjeç, që do të thotë se është e paqartë nëse efikasiteti 90% vlen për të moshuarit, të cilët janë më të rrezikuarit nga Covid-19.
Kjo ka bërë që AstraZeneca të njoftojë një provë të re klinike duke përdorur doza më të ulëta, megjithëse kjo nuk pritet të ndikojë në afatin kohor për miratimin dhe përhapjen e vaksinës dhe Europë.
Prof David Salisbury, ekspert i imunitetit në Universitetin e Oksfordit tha se provat e mëtejshme klinike ishin të rëndësishme.
“Nëse kjo vaksinë është vërtet 90% efikase dhe është një vaksinë më e lirë dhe kërkon një ruajtje më pak rigoroze sesa vaksinat e ARN-së [nga Moderna dhe Pfizer / BioNTech], atëherë ky do të ishte një rezultat i shkëlqyer,” tha ai.
“Por nëse ofron 62% mbrojte dhe vaksinat e tjera 90% atëherë unë mendoj se duhet të mendohemi me shumë kujdes, çfarë të bëjmë me 100 milion doza të një produkti që nuk të mbron plotësisht”.
Kjo mund të çojë në vendime të ashpra, tha ai. “Unë mendoj se Europa do t’i japë përparësi përdorimit të vaksinave të tjera duke përdorur vaksinat me efikasitet më të lartë tek njerëzit më të rrezikuar”, shtoi ai.
Prof Helen Fletcher, një profesoreshë e imunologjisë thotë që Europa të përdorë vaksina të ndryshme për grup mosha të ndryshme.
“Me shumë vaksina në dispozicion, mendoj se është e drejtë që politikbërësit të mendojnë se cilat vaksina mund të funksionojnë më mirë për popullata të caktuara”, tha ajo. “Kjo nuk është e pazakontë: ne u japim tre lloje të ndryshme të vaksinave të gripit fëmijëve, të rriturve dhe të moshuarve, pasi ne e dimë se platforma të ndryshme të vaksinave funksionojnë më mirë në grup mosha të ndryshme.”
