Policia pritet të hedhë dritë mbi atentatin e një nate më parë në Vlorë, ku mbetën të vrarë me armë zjarri kallashnikov në ambientet e një lokali, kreu i OSHEE, Roland Saliu dhe pronari i një televizioni privat, Mirvjen Hyseni.
Dyshimet e para flasin për larje hesapesh pasi atentati ka qenë i mirëorganizuar. Autori pasi zbrazi armën te “Sheshi i Flamurit” ka dalë jashtë Vlorës, duke djegur makinën pranë fshatit Panaja.
Dëshmitare në këtë ngjarje ka qenë një vajzë e mitur e cila ka shpëtuar fatmirësisht mes plumbave të autorëve.
Mësohet se vajza është e bija e biznesmenit Hyseni, e cila në momentin e atentatit ka qenë duke luajtur me biçikletë pranë tavolinës ku ndodhej i ati i saj raporton Shqiptarja.com.
Ajo ka parë të gjithë skenën e tmerrshme ku breshëritë e armës automatike u zbrazën mbi tavolinën ku ndodheshin dy viktimat Saliu dhe Hyseni.
Kamerat e sigurisë kanë regjistruar të gjithë momentin e ngjarjes, ndërsa pamjet filmike janë sekuestruar nga policia dhe po punohet për identifikimin e autorëve.
20 të shoqëruar
Rreth 20 persona janë shoqëruar në polici për vrasjen e dyfishtë në Vlorë.
Dyshohet se shënjestër e atentatit ka qenë biznesmeni i njohur në Vlorë, Hyseni, ndërsa kreu i OSHEE është vrarë aksidentalisht.
Hyseni ka lidhje gjaku me një nga anëtarët e bandës së Çoles, megjithatë policia po heton dhe për të shkuarën e tij e cila mund të ndihmojë në zbërthimin e dinamikës së kësaj ngjarje./a.m.
