Ministrja e Arsimit, Evis Kushi ka reaguar në lidhje me rastin e 13-vjeçarit nga Lushnja, i cili humbi jetën duke u vetëvarur aksidentalisht duke bërë video për ta hedhur në rrjetet sociale.
Ministrja Kushi bëri thirrje që prindërit dhe shkollat të ngrenë alarmin dhe të kontrollojnë qëndrimin në internet të fëmijëve të tyre.
“URGJENTE!
Jam shumë e tronditur nga ngjarja e fundit e 13 vjeçarit në Lushnje! Aksesi i fëmijëve në internet për një kohë të gjatë dhe në burime apo informacione të pakontrolluara dhe të parekomandueshme për moshën e tyre është një nga çeshtjet që unë kam ngritur vazhdimisht në takime të ndryshme. Edhe para pak ditësh e ngrita si alarm në takimin e zhvilluar në kuadër të projektit “Shkolla për Shëndetin” ku theksova nevojën e një debati të gjerë publik për këtë emergjencë shoqërore.
Jo vetëm shkollat dhe institucionet, por edhe familjet dhe çdo individ duhet të marrë sot përgjegjësinë për këto raste fatale!”, shkruan ministrja Kushi.
