Banorët e Shkodrës do të përfitojnë një shërbim më të shpejtë dhe më efikas të urgjencës mjekësore, pas riorganizimit të këtij shërbimi jetik në territor. Banorët e këtij qarku, të cilët në të shumtën e rasteve përdornin mjetet e tyre për të mbërritur në spital, duke filluar nga java e ardhshme, do të shërbehen nga 9 autoambulanca, nga 5 deri më tani, të cilat janë të monitoruara nëpërmjet një sistemi elektronik gjurmimi satelitor (GPS) në çdo moment.
Riorganizimi i shërbimit të urgjencës synon ndryshimin cilësor të këtij shërbimi. Ajo që po bëjmë, u shpreh Beqaj, është se “po përqëndrojmë komandimin duke
dekoncentruar flotën,” pasi sipas tij, deri më sot, “ne jemi mësuar që ambulancat tona e kishin vendin pranë urgjencave të spitaleve, dhe prej aty, niseshin për të shkuar në territor”.
Sipas kreut të shëndetësisë, me jetësimin e këtij projekti madhor të organizmit të ri të Urgjencës Kombëtare Mjekësore në Shqipëri, i cili është një nga pesë objektivat kryesore të Programit 4-vjeçar të Qeverisë për Shëndetësinë, pas miratimit të ligjit në nëntor 2014, pas krijimit të institucionit të Qendrës Kombëtare të Urgjencës Mjekësore, filloi puna për optimizimin e përdorimit të burimeve që kemi. “Kishim në shërbim të qytetarëve një mjet funksional për 43 mijë banorë,” u shpreh Beqaj, duke theksuar se do të arrijmë tek “një për 25 mijë banorë, që nga marrja e një thirrjeje për urgjencë të shkurtojmë shumë vajtjen për tek thirrja, tek nevoja, e cila do të fillojë të zbatohet duke filluar nga javët e ardhshme”.
“Urgjenca është hapi i parë i mjekësisë, është porta e qytetarit që ne shkojmë dhe trokasim kur ka nevojë dhe spitali është dera ku qytetari vjen dhe troket për herë të parë kur vjen vet ose kur e sjellin me ambulancë,” tha z. Skënder Brataj, Drejtori i Qendrës Kombëtare të Urgjencës Mjekësore, duke shtuar se riorganizimi i këtij shërbimi “do të sjellë një mbulim më të shpejtë, më të saktë për një marrjen në dorëzim të qytetarit nga shërbimi publik, deri në zgjidhjen me efikasitet të problemit të tij”.
Për Qarkun e Shkodrës, me një popullsi prej 215 mijë banorësh, me 31 njësi, 254 fshatra dhe qytete, një Spital Rajonal dhe dy spitale lokale, numri i autoambulancave bëhet 9 nga 5 që kanë qenë deri më sot. Me riorganizimin e këtij shërbimi, përveç autoambulancave të reja, Qarkut të Shkodrës i shtohen 16 infermierë, 15 shoferë dhe një kordinator.
