Kreu i Misionit i Ambasades tonë në Vatikan, Visar Zhiti, pati një takim në Pallatin Magjistral të Urdhërit Sovran Militar Spitalor të Shën Gjonit të Jeruzalemit dhe të Maltës, me këshilltarin e Kancelarit të Madh, ambasadorin Daniele Verga.
Pasi falenderoi për pritjen, Zhiti foli për marrëdhëniet shumë të mira të vendin tonë me Urdhërin e Maltës, – tashmë ato i kaluan 20 vitet, – dhe çmoi mbështetjen e tyre në fushat humanitare, shëndetësore, arsimore, të emigracionit, etj, shprehu mirënjohjen për dekorimin që iu bë së fundmi Ministrit tonë të Jashtëm, zotit Bushati nga Princi i Urdhërit Sovran të Maltës, Mjeshtri i Madh, Shkëlqesia e Tij e Lartë Fra Mattheë Festin, ndërkaq, theksoi Zhiti, që këto marrëdhënie të vazhdohen, gjithmonë e më në ngritje.
Këshilltari i Kancelarit të madh, ambasadori Daniele Verga, ndër të tjera tha se Urdhëri Sovran Militar Spitalor i Maltës ka një prani të mirë në Shqipëri dhe arritje në veprimtaritë që ajo parashikon dhe kryen.
Konkretisht ai tha se Urdhëri i Maltës ka firmosur marrëveshje me institucione te qeverise shqiptare e do të donin të ngrinin një “Pronto Soccorso” (Ndihmë të shpejtë), apo “Corpo Sanitario” (Qendra të shendetit), ku të trajnoheshin të rinj dhe të kishte statusin e Kryqit të Kuq dhe të Caritasit, për t’u ardhur në ndihmë banorëve.
Ne, – vazhdoi ambasadori Verga – jemi pranë krizave humanitare, kudo në botë, në ato të emergjencave e tani pranë kampeve të emigranteve, siç ishim në fillim të viteve ’90 pranë shqiptarëve, tani jemi në Lampeduza, pranë emigrimit afrikan dhe duam dhe bashkëpunimin me ju në përballje me realitet të tilla, duke mundësuar specializimet që ofrojmë, etj.
Të zgjerojmë bashkëpunimin dhe në arsim e kulturë, theksoi Zhiti dhe konkretisht jemi përpara veprimtarish të ngjarjeve të mëdha, shenjtërimi i Nënë Terezës, po kështu dhe lumturimi i 38 martirëve të kishës shqiptare, që do të lumturohen së shpejti në Shkodër, sakrifica e tyre moralisht është për gjithë njerëzimin ashtu siç punon dhe Urdhëri i Maltës.
Këshilltari i Kancelarit të madh, ambasadori Daniele Verga premtoi mbështetje dhe bashkëpunim konkret.
Biseda kaloi dhe në zhvillimet e fundit rajonale e botërore, konfliktet që nuk duhen të lejohen të degradojnë si konflikte besimesh fetare, përkundrazi duhet harmoni e bashkëpunim, siç është shembull emblematik Shqipëria dhe ai foli me entuziazëm për përparimet e Tiranës si metropol dhe të Shqipërisë në përgjithësi.
