Misioni i KB në Kosovë do të duhej publikisht, përmes medieve, të pranojë se të ikurit që i vendosi në kampe në pjesën veriore të Mitrovicës janë helmuar me plumb.
Ky është mendimi i Komisionit Këshilldhënës për të Drejtat e Njeriut në këtë mision, pas ankesës së 138 pjesëtarëve të komunitetit rom, ashkali e egjiptian, të cilët kanë jetuar në pesë kampe të administruara nga UNMIK-u, transmeton Koha.net.
Ankuesit kishin pohuar se janë helmuar nga plumbi dhe se ndërkohë si pasojë e mungesës së kushteve higjienike janë përballur me probleme shëndetësore. Ata, në vend 20 ditë, në këto kampe kanë mbetur të jetojnë vite me radhë.
Komisioni Këshilldhënës i UNMIK-ut për të Drejtat e Njeriut ka njoftuar se KB do të duhej të ofronte kompensim financiar për komunitetin rom në Kosovë.
