Po bëhen 40 ditë që kur Universiteti i Prishtinës “Hasan Prishtina”, është pa rektor dhe pa ushtrues të detyrës së tij. Edhe pse në shikim të parë duket se asgjë nuk ka ndryshuar në menaxhim, megjithatë pa rektor apo pa një Ushtrues të detyrës, ky institucion e ka vështirë të funksionojë.
Siç merr vesh Infopress, problemi i parë që është paraqitur në UP janë lëshimi i diplomave për të diplomuarit. Një numër i madh i studentëve të diplomuar tash e 40 ditë nuk mund t’i tërheqin diplomat. Këshilli Drejtues i UP-së, gabimin e ka bërë që nga fillimi, konkretisht nga dorëheqja e rektorit Zejnullahu, pasi nuk ka emëruar një ushtrues detyre, konform ligjit dhe akteve të tjera.
Infopress që dy ditë me radhë ka kontaktuar sekretarin e Universitetit të Prishtinës, Esat Kelmendin, i cili nuk i është përgjigjur telefonatave, e as nuk ka kthyer përgjigje për pyetjet e dërguara dy ditë më parë.
