Kreu i Grupit Parlamentar të Partisë Demokratike, Enkelejd Alibeaj shprehet se ai është drejtuesi i kësaj force politike.
I pyetur në një prononcim për mediat se pse nuk është regjistruar në gjykatë dorëheqja e Lulzim Bashës 1 vit më parë, Alibeaj sqaroi se këto akte nuk shënohen në regjistrin e partive politike.
Sipas tij, në raste dorëheqje, regjistrohet zgjedhja e kryetarit të ri të partisë. Alibeaj shtoi se PD-ja do të zhvillojë një proces për zgjedhjen e kreut të ri të PD-së.
Pyetje: Kush është kryetari i PD-së sot? Ndiheni kryetar i PD-së?
Alibeaj: Jo vetëm jam, por ndihem drejtuesi i PD-së, ushtruesi i detyrës që nga momenti kur Basha dha dorëheqjen.
Pyetje: Pse nuk e dërguat dorëheqjen e Bashës në gjykatë?
Alibeaj: Nuk është kjo kryesorja. Duhet ta dini se sipas ligjit, në regjistrin e partive politike regjistrohen emrat e kryetarëve të partive. Në rastin kur ka një dorëheqje, ajo se çfarë do duhet të regjistrohet është zgjedhja e kryetarit të ri të partisë. Aktet e dorëheqjes nuk regjistrohen. Duhet të priten, siç jeni në dijeni, që PD-ja do organizojë procesin e zgjedhjeve nga baza deri në kreun e saj sipas rregullave dhe procedurave.
Ashtu siç e kemi thënë muaj më parë, me formulën se si mund të zgjedhim një kandidat unik dhe fitues, duke mos përjashtuar asnjë, modelet janë nga më të ndryshme. Ne kemi propozuar sondazhet. Aty ku nuk kemi shpallur kandidatë, janë të ftuar kandidatët e Primareve.
/e.d
