Autoriteti Rrugor Shqiptar ka ngritur grupin e punës me qëllim vlerësimin e banesave, të cilat preken nga projekti i ndërtimit të “Unazës së Madhe”.
ARRSH ka shpallur emrat e personave që do të bëjnë vlerësimin e të gjitha pasurive që do të preken nga projekti i “Unazës së Madhe”, konkretisht në mbikalimin e Pallatit me Shigjeta-Sheshi Shqiponja.
Grupi i punës i ngritur nga ARRSH, do të merret me një sërë detyrash si:
Kryerjen e të gjithë korrespodencave me institucionet për marrjen e dokumentacionit dhe konfirmimeve që nevojiten për plotësimin e “Kërkesës për shpronësim”.
Plotësimin e “Kërkesës për shpronësim” për të gjitha pronat private që trajtohen sipas ligjit për shpronësimet.
Dorëzimin e “Kërkesës për shpronësim brenda muajit dhjetor.
Gjithashtu grupi i punës, është ngarkuar që në bashkëpunim me institucionet shtetërore të kryej matjet, vlerësimin dhe përgatitjen e dokumentacionit teknikoligjor për kalimin kapital për të gjitha pasuritë shtetërore që preken nga ky projekt.
Ngritja e grupit të punës për vlerësimin e pasurive u paralajmërua edhe më herët në një konferencë nga drejtori i ARRSH, Afrim Qendro.
/b.d
