Shkojnë drejt përfundimit punimet edhe në segmentin e tretë të Unazës së Vogël, e cila së bashku me dy segmentet e tjera pritet të hapet shumë shpejt. Ndërsa ka përfunduar shtrimi i asfaltit, korsia e biçikletave por edhe trotuari për këmbësorët dhe personat që nuk shikojnë, tashmë këtij segmenti po i jepet dhe dora e fundit e punimeve që kanë të bëjnë me shtrirjen e rrjetit elektrik dhe ndriçimin.
“Mirënjohje për kolegët tanë të cilët nuk ndalen as në fundjavë. Edhe pak punë për të hapur 3 nga 4 segmentet e Unazës së Vogël! Faleminderit për durimin!”, shkruan kryetari i Bashkisë, Erion Veliaj në një status në rrjetin social “Facebook” ku dhe ka publikuar një album me foto nga punimet që po kryen në terren. 
