Një nga tifo-grupet ultras të Tiranës, “Capital Crew”, ka ndezur disi atmosferën në prag të ndeshjes Tirana-Crvena Zvezda, që luhet në orën 20:00, në “Air Albania Stadium”. Pjesëtarët e këtij tifo-grupi kanë shpalosur një banderolë përpara Universitetit Politeknik të Tiranës me një mesazh për skuadrën serbe.
Në banderolë shkruhet: “Lufta e shqiptarit ka burrëri, ne nuk merremi me gra dhe fëmijë!” dhe “Kosova, zemra e Shqipërisë”. Në banderolë është vizatuar portreti i heroit Adem Jashari, duke mbrojtur vatanin me armë në dorë. Një mesazh që u referohet masakrave të përgjakshme të serbëve në Kosovë. Për këto veprime tifo-grupi i Tiranës ka bërë bujë në Kosovë, ku komentet pozitive janë të shumta.
Nuk janë pëlqyer në anën tjetër veprimet e shumë gazetarëve, sidomos atyre që janë me Interin, pasi kanë bërë foto me trajnerin e Crvena Zvezdës, Dejan Stankoviç. Ndeshja e sotme luhet pa tifozë, ndaj dhe “Capital Crew” e ka shpalosur banderolën në pjesë e Korpusit, pranë stadiumit. Një banderolë që me siguri nuk do t’u shpëtojë përfaqësuesve të shtypit serb.
