Vrasja e efektivit të RENEA-s dhe plagosjes së dy efektivëve të tjerë në fshatin Lazarat, ka sjellë reagime të shumta në opinionin publik. Edhe deputeti i PS Ulsi Manja ka reaguar për ngjarjen e rëndë duke e konsideruar këtë akt si goditje që krimi i ka bërë shtetit dhe jo vetëm policisë.
Manja theksoi se në një situatë të tillë politika shqiptare duhet të shprehet qartë në mbështetje të Policisë së Shtetit dhe cdo efektivi të saj në zbatimin e ligjit dhe garantimin e jetës dhe sigurisë.
“Sot u qëllua mbi 3 shërbëtorë të devotshëm të shtetit, ndaj edhe u godit shteti. Ngjarje të tilla duhet të na bëjnë bashkë, të jemi në krah të policisë së shtetit. Krimi do luftë, kjo ngjarje provoi se krimi nuk njeh kufi. Beteja me krimin as fillon dhe as mbaron këtu. Unë jam i bindur që autorët e ngjarjes do të vihen shumë shpejt para drejtësisë dhe ngjarja do zbardhet. Këta persona të këkrkuar nuk kanë lidhje me banorët e Lazaratit, por ajo që unë nuk kuptoj është sepse këta persona janë mbledhur në Lazarat gjatë ditëve të fundit”, tha Manja.
Në vijim ai komentoi edhe deklarimet e bëra nga kreu demokrat Lulzim Basha, për të cilin u shpreh se ai duhet të kërkonte falje për akuzat dhe sulmet që i janë bërë policisë në këto 20 muaj apo në gjendjen që la Policinë e Shtetit qeveria ku bënte pjesë Basha.
