Manja: Me sa duket, opozita në mos qofsha i gabuar duket se është bërë pishman për dhënien e votës mesnatën e 21 dhe 22 korrikut. Me këto ishla ligjore që nxjerr në lidhje me ligjin për Vettingun, kërkon të shtyjë në kohë procesin e zbatimit të reformës në drejtësi, për ta futur atë në kalendat greke kur dihet se viti që vjen është vit zgjedhor. Nuk kemi pasur një model, sepse ligji për Vettingun, apo procesi i Vettingut që do të zbatohet në Shqipëri është unik në llojin e vet. Për Vettingun është shprehur pozitivisht edhe Venecia.
Deputeti socialist, anëtar i Komisionit të Ligjeve tha gjithashtu, tha se raporti i ILDKKPI-së për pasurinë e gjyqtarëve dhe të prokurorëve, dhe raporti i DSIK-së për figurën nuk është detyrues për komisionin e Vettingut.
Manja: Kushtetuta ka përcaktuar se baza e Vettingut janë deklarimet vullnetare që do të bëjnë gjyqtarët dhe prokurorët. Barrën e provës e kanë vetë gjyqtarët dhe prokurorët. Manja tha se këto institucione nuk e kanë monopolin e vendimmarrjes për gjyqtarët dhe prokurorët pavarësisht se janë nën varësinë e kryeministrit. Këtë të drejtë e ka Komisioni i Pavarur i Monitorimit, i cili do të monitorohet nga vëzhguesit ndërkombëtar.
Ligji i Vettingut do të hyjë në fuqi 15 ditë pas publikimit në Fletoren Zyrtare. Me hyrjen në fuqi, deputeti Manja tha se do të fillojë puna e ngritjen e komisioneve të Vettingut.
Manja: Fillimisht do të përzgjidhen komisionarët e Vettingut dhe gjyqtarët e Kolegjit të Apelimit dhe komisionerët publikë. Natyrisht do të fillojë puna për Vettingun e institucioneve të para që do t’i nënshtrohen. Sipas përcaktimeve kushtetuese, institucionet e para që do t’i nënshtrohen procesit të Vettingut janë subjektet që do të garojnë për të qenë pjesë e Këshillit të Emërimeve në drejtësi. Pastaj me radhë do të jenë gjyqtarët dhe prokurorët që do të jenë pjesë e KLGJ-së dhe KLP-së dhe Inspektorati i Lartë i Drejtësisë. Kushtetuta ka përcaktuar se brenda 8 muajve duhet të ngrihet Këshilli i Lartë Gjyqësor, Këshilli i Lartë i Prokurorisë, Inspektorati i Lartë i Drejtësisë dhe brenda dy muajve nga ngritja e KLGj-së dhe KLP-së duhet të krijohen strukturat e SPAKU-t, strukturat antikorrupsion, Prokuroria Speciale dhe Gjykatat e Posaçme.
ma.me
