Ukraina njoftoi mesditën e kësaj të mërkure se do të shpallë gjendjen e jashtëzakonshme. Lajmi u bë i ditur nga Këshilli Kombëtar i Sigurisë.
Vendimi erdhi pas një mbledhje të këtij Këshilli. Zyrtari i lartë ukrainas Oleksiy Danilov tha se gjendja e emergjencës shtetërore do të vendoset në të gjitha rajonet, me përjashtim të Donetsk dhe Luhansk, ku forcat ukrainase janë tashmë në luftë me separatistët e mbështetur nga Rusia.
Gjendja e jashtëzakonshme do të vendoset fillimisht për 30 ditë. Megjithatë, siç shkruan BBC, kjo lëvizje duhet të aprovohet më parë nga parlamenti Ukrainas.
Ndërkohë, Ministria e Jashtme e Ukrainës kërkoi nga qytetarët e saj që të mos vizitojnë Rusinë dhe paralajmëroi çdo ukrainas që ndodhet në këtë shtet që të largohet menjëherë.
