Dronë, dronë dhe sërish dronë. Janë arma e së tashmes në frontin ruso-ukrainas, paralajmërim i luftërave të së ardhmes dhe obsesioni kryesor i analistëve ushtarakë.
Sot, gati 80% e humbjeve në të dy ushtritë shkaktohen pikërisht nga dronët. Janë ata që po i lejojnë Ukrainës të rezistojë ndaj pushtimit, katër vjet pas nisjes së luftës, dhe sipas disa burimeve, edhe të fitojë terren ditët e fundit duke shtyrë mbrapsht avancimet ruse.
Sipas raportimeve që po qarkullojnë mes blogerëve ushtarakë nga të dy kampet, Ukraina mund të ketë rimarrë deri në 200 kilometra katrorë territor mes së mërkurës dhe së dielës së kaluar. Megjithatë, lajmi duhet marrë me rezerva.
Bëhet fjalë për avancime në të ashtuquajturën “zonë gri”, territor që nuk kontrollohet plotësisht nga asnjëra palë, ndërsa propaganda dhe dezinformimi e bëjnë edhe më të paqartë panoramën reale të luftës.
Në një bazë të brigadës së 157-të mekanizuar, pranë kufirit me Rusinë në veri të vendit (vendndodhja nuk bëhet publike për arsye sigurie), oficerët ukrainas shpjegojnë se përpjekja kryesore aktualisht është mbrojtja e pozicioneve të operatorëve të dronëve nga sulmet ruse.
“Ne ndërtojmë dronë me autonomi më të madhe për të goditur prapavijat e armikut, dhe të njëjtën gjë bëjnë edhe rusët kundër nesh. Është një garë për bateri kineze më të fuqishme dhe dronë më të lehtë: Ne përdorim fibër karboni, ata aliazhe alumini”, tregojnë burimet në terren.
Sipas ekspertëve ushtarakë të cituar nga AFP, mbi bazën e të dhënave të Institutit për Studimet e Luftës, nëse konfirmohet, rimarrja e rreth 200 kilometrave katrorë në më pak se një javë do të ishte avancimi më i madh ukrainas që nga qershori i vitit 2023, i krahasueshëm për nga shtrirja me sukseset ruse të dhjetorit të kaluar.
Një nga faktorët kyç, sipas këtyre burimeve, është bllokimi i Starlink për forcat ruse. Blogerë ushtarakë në Moskë pohojnë se kjo ka krijuar probleme serioze në komunikimin mes njësive në front dhe në përdorimin e dronëve.
Situata është përkeqësuar edhe më shumë pas vendimit të Vladimir Putin për të kufizuar aksesin në Telegram, një mjet që oficerët rusë e përdornin shpesh për të dhënë urdhra në terren. Kremlini synon të kontrollojë informacionin online, veçanërisht atë mbi humbjet e rënda.
Së fundmi, ministri ukrainas i Transformimit Digjital, Mykhailo Fedorov, ka deklaruar se Rusia ka humbur rreth 35 mijë ushtarë në janar dhe 30 mijë në dhjetor, mes të vrarëve, të plagosurve dhe të zhdukurve.
Moska i ka mohuar këto shifra, por analistët perëndimorë i konsiderojnë të besueshme. Fedorov theksoi gjithashtu rritjen e përdorimit të dronëve tokësorë: Mbi 7 mijë misione vetëm në janar, për të kompensuar mungesën e trupave.
Sipas burimeve ukrainase në rrjet, avancimet më të rëndësishme janë regjistruar në juglindje të Zaporizhzhia-s dhe rreth Huliaipole-s.
Nëse konfirmohen, këto lëvizje do të tregonin një sukses të pjesshëm në përpjekjet për të zmbrapsur pozicionet ruse që, me dronë kamikazë, kishin nisur të kërcënonin edhe jetën civile në Zaporizhzhia. Avancime më të kufizuara raportohen edhe në sektorin e Kharkiv-it dhe në Donbass, veçanërisht në Kostiantynivka, Novopavlivka dhe rreth qytetit të kontestuar të Pokrovsk.
Megjithatë, Ministria e Mbrojtjes në Kiev nuk ka dhënë konfirmime zyrtare. Një oficer i lartë ukrainas, i njohur online me pseudonimin Alex dhe i konsideruar burim i besueshëm, flet hapur për “ekzagjerime pa bazë” dhe mohon se mund të flitet për një kundërofensivë të mirëfilltë.
“Për momentin shohim vetëm rregullime të vogla taktike të disa njësive. Rusët po rrisin forcat e tyre dhe në disa sektorë situata jonë është dukshëm përkeqësuar”, paralajmëron ai.
