Ukraina po prezanton një qasje të re në mbrojtjen ajrore, duke përdorur grupe të vogla të lëvizshme me dronë interceptues, në pritje të sulmeve të reja masive nga Rusia, deklaroi presidenti Volodymyr Zelensky.
Vendi ende po përballet me pasojat e sulmeve ruse në fillim të këtij muaji, të cilat lanë pa energji elektrike dhe ngrohje mijëra banesa, veçanërisht në Kiev, në mes të temperaturave nën zero.
“Sistemi do të transformohet”, u shpreh presidenti ukrainas në fjalimin e tij të përnatshëm, duke njoftuar edhe emërimin e Pavlo Yelizarov si zëvendëskomandant i ri i forcave ajrore për të drejtuar këtë nismë.
Zelensky u bëri thirrje qytetarëve të jenë “jashtëzakonisht vigjilentë”, duke paralajmëruar se Rusia po përgatit një goditje të re masive.
Sipas autoriteteve ukrainase, shërbimet e inteligjencës kanë vërejtur aktivitet zbulues rus ndaj objektivave kritike, përfshirë nënstacionet që furnizojnë me energji centralet bërthamore.
Forcat ruse ndërmorën një sulm të kombinuar me dronë dhe raketa ndaj Kievit në orët e para të së martës, duke shkaktuar ndërprerje të energjisë elektrike dhe ujit. Një ndërtesë jo-banesore u godit në bregun lindor të lumit Dnipro dhe një person u plagos, njoftoi kryebashkiaku Vitali Klitschko.
Administrata ushtarake e Kievit bëri të ditur se janë dëmtuar edhe zona magazinimi dhe disa automjete janë përfshirë nga flakët.
Gjatë natës nga e diela në të hënën, Rusia kreu një valë sulmesh me dronë ndaj infrastrukturës energjetike të Ukrainës, duke lënë pa energji pesë rajone. Sipas forcave ajrore ukrainase, nga 145 dronë të lëshuar, 126 u rrëzuan.
Rajonet Sumy, Odesa, Dnipropetrovsk, Kharkiv dhe Chernihiv mbetën pa energji elektrike, ndërsa ekipet e emergjencës po punojnë për riparimin e dëmeve.
Autoritetet ukrainase paralajmërojnë se organizimi i zgjedhjeve të para që nga pushtimi rus i vitit 2022 do të jetë një proces i vështirë për shkak të dëmeve të mëdha infrastrukturore dhe zhvendosjes së miliona qytetarëve.
Ndërkohë, i dërguari i posaçëm i presidentit rus Vladimir Putin, Kirill Dmitriev, pritet të udhëtojë këtë javë në Davos, ku do të zhvillojë takime me përfaqësues të delegacionit amerikan në kuadër të Forumit Ekonomik Botëror. Edhe negociatori kryesor i Ukrainës, Rustem Umerov, ka konfirmuar vazhdimin e bisedimeve me zyrtarë amerikanë gjatë forumit.
