sh Ambasadori i Shteteve të Bashkuara të Amerikës në Shqipëri, z. Xhon Uidhers vizitoi ambientet e qendrës rezidenciale për të rinjtë LGBTI, “STREHA”, e para shelter për personat LGBTI të pastrehë ose të dhunuar.
Z. Uidhers ka qenë një prej mbështetësve më aktivë të lëvizjes për të drejtat e LGBTI në Shqipëri. Këtë angazhim ai e shpjegon edhe në dokumentarin SkaNdal ku dy organizatat Aleanca LGBT dhe ProLGBT kanë dokumentuar fillimet e lëvizjes LGBTI në vendin tonë.
Pasi u njoh me sfidat dhe punën e qendrës “STREHA” z. Uidhers u shpreh se nuk e kishte menduar dot që në Shqipëri gjërat mund të ndryshojnë kaq shpejt.
“Në kohën kur unë shërbeja si ambasador në Shqipëri një qendër të tillë si STREHA jo vetëm që nuk mund ta përfytyronim por as nuk mund ta ëndërronim”, u tha z. Uidhers aktivistëve dhe punonjësve të shelterit.
Ish-ambasadorit, i cili ka krijuar një marrëdhënie të vecantë me shqiptarët e vecanërisht me komunitetin LGBTI iu dha këtë javë “Celësi i Tiranës” nga kryebashkiaku Erion Veliaj. “Unë e admiroj kurajon tuaj”, tha z. Uidhers, duke e shpjeguar këtë me një shembull nga jeta e tij personale.
“Kur unë eci rrugëve të SHBA”, tha ai, “njerëzit e dinë se kush jam, jam një njeri me prejardhje afriko-amerikane dhe këtë gjë unë nuk e fsheh dot pavarësisht cfarë reagimi mund të kenë njerëzit. Por guximi juaj është i tillë që duke u ngritur hapur për kauzën tuaj keni vendosur të mos e mbani fshehur dhe të jepni kontributin që ky komunitet të jetojë i lirë. Kjo është kurajo që jo kushdo mund ta ketë”.
Streha është shërbimi i vetëm rezidencial që u vjen në ndihmë personave të komunitetit LGBTI që përballen me dhunë ose përzihen nga shtëpia. Ajo është bërë e mundur falë mbështetjes së USAID përmes Assist Impact, Ambasadës Britanike, Agjencisë së Mbështetjes së Shoqërisë Civile dhe Albert Kennedy Trust. Aleanca LGBT dhe ProLGBT janë dy organizatat që kanë themeluar këtë shërbim.
