Gianni Infantino, Sekretari i Përgjithshëm i UEFA-s dhe kandidat për presidencën e FIFA-s, ka hedhur poshtë idenë se finalet e Euro 2016 mund të mos luhen në Francë për shkak të mungesës së sigurisë. Ai tha se stadiumet konsiderohen vende të sigurta, pasi policia franceze është mjaft e përgatitur në stërvitjet intensive për t’i ruajtur vendet e zhvillimit të ndeshjeve. Infantino foli në përgjigje të presidentit të Federatës Franceze, Le Graet, i cili tha se nuk ka siguri për finalet, duke parë çfarë ndodhi.
“Euro 2016 do të luhet në Francë dhe për këtë ju garantoj. Stadiumet janë vendet më të sigurta në botë. Policia dhe instancat e tjera të sigurisë franceze kanë bërë shpesh stërvitje për sulme të mundshme terroriste apo ngjarje të tjera të rrezikshme, rezultatet kanë qenë fantastike, ndaj nuk ka pse të ketë panik për organizimin”, tha Infantino.
Edhe në sulmin e fundit, kamikazëve nuk iu krijua mundësia për të hyrë në stadium për ndeshjen Francë-Gjermani, por shpërthimet nuk u shmangën, edhe pse jashtë stadiumit. Në pamundësi për të hyrë brenda, vetëvrasësit e mundshëm munt t’i shpërthejnë bombat jashtë stadiumeve, në mes të turmës së tifozëve, çka do të ishte një tragjedi e madhe.
