Udhëheqësit botërorë kanë dënuar sulmin e forcave ruse mbi centralin bërthamor të të Zaporizhzhia dhe akuzojnë Rusinë se po rrezikon sigurinë e një kontinenti të tërë.
Centrali bërthamor i Zaporizhzhia është më i madhi në Evropë dhe ndodhet në juglindje të Ukrainës. Ai u përfshi nga një zjarr masiv gjatë orëve të para të së premtes pas një sulmi të ndërmarrë nga forcat ruse.
Shërbimet e Urgjencës të Ukrainës arritën të shuanin zjarrin, por centrali u morr nën kontroll nga rusët.
Kryeministri i Mbretërisë së Bashkuar Boris Jonson tha se sulmi “i pamatur” i Rusisë mund të “kërcënojë drejtpërdrejt sigurinë e të gjithë Evropës”.
“Sapo fola me Presidentin Volodymir Zelensky në lidhje me situatën jashtëzakonisht shqetësuese në termocentralin bërthamor të Zaporizhzhia. Rusia duhet të ndërpresë menjëherë sulmin e saj ndaj termocentralit dhe të lejojë akses të papenguar për shërbimet e urgjencës në termocentral”, tha Johnson.
Presidenti i SHBA Joe Biden i kërkoi Moskës të ndalojë aktivitetet e saj ushtarake rreth zonës.
“Presidenti Biden iu bashkua Presidentit Zelenskyy për t’i kërkuar Rusisë që të ndërpresë aktivitetet e saj ushtarake në zonë dhe të lejojë zjarrfikësit dhe reaguesit e urgjencës të hyjnë në vend,” tha Shtëpia e Bardhë.
