Prej thuajse 20 vitesh, Liljana i ka dhënë fund një martese të vështirë ku ka përjetuar dhunën fizike e psikologjike. Nga ajo martesë ka tre fëmijë, për të cilët u përpoq ta mbante familjen të bashkuar duke përtypur gjithçka. Në rubrikën “Ka Një Mesazh Për Ty” nga “E Diela Shqiptare” në Tv Klan, ajo tregoi sesi pavarësisht dhunës, vendosi të sakrifikonte dhe të kalonte detin me skaf bashkë me ta për t’u siguruar të ardhmen.
Jeta në Itali nuk ndryshoi marrëdhënien mes Liljanës dhe burrit, i cili vijonte ta dhunonte e të kishte probleme me alkoolin që çuan deri në divorcin e tyre. Por ajo tregon se i ka këshilluar gjithnjë fëmijët të kujdesen për të atin dhe pas thuajse 20 vitesh divorc, janë gjendur në të njëjtën tavolinë.
“Kur jam ndarë me ish-burrin tim, u kam thënë fëmijëve shikojeni, e keni babanë tuaj, unë me atë s’kam më punë. Unë kam gati 20 vjet që jam ndarë me të, por kur martova djalin këtu në 2022, ne u ulëm në një tavolinë me të sepse është babai i fëmijëve. Unë te njerëzit e tij shkoja gjithmonë, edhe pse isha e ndarë, kur vdiq vjehrri, unë shkova, kur vdiq vjehrra para dy vjetësh këtu te ne në Akërni, unë i njoma buzën me pambuk asaj deri në momentin e fundit. Ajo i merrte duart e mia, i puthte, pleqtë s’më kishin faj. Janë një familje e mrekullueshme ata!”
Vitet 2006-2007 ishin të vështira për Liljanën sepse humbi prindërit njëri pas tjetrit. Ajo e kujton me shumë dhimbje këtë periudhë, por pranë i është gjendur vëllai i madh me kunatën.
“Mua më është gjendur vëllai i madh, me gjithë nusen, ma kanë mbajtur gjithnjë derën hapur. Edhe pse kisha shtëpinë time aty, unë rrija gjithmonë tek ata. Pa pyetur kunatën, unë s’bëja asgjë. Ajo më jepte edhe këshilla, e kisha në vend të nënës, edhe pse pleqtë më ikën, unë derën tek ata e kisha të hapur, e kam akoma. Edhe tani që vij, unë rri më shumë tek ata”, rrëfen ajo teksa shton: “Unë kur flija tek ata, nusja e vëllait çohej në mëngjes, nuk di nëse e bën një nuse këtë, ajo bënte kafen, mbushte gotën me qumësht e me kafe se e dinte sesi e pija unë, merrte dhe ëmbëlsirën dhe m’i binte te divani, unë s’isha ngritur akoma nga shtresat. Ajo e bënte këtë gjë dhe e bën akoma.”
