Pasi mori lajmin për shkarkimin nga detyra, Bledi Çuçi ka reaguar në rrjetet sociale, ku falënderon kryeministrin Rama për besimin që i dha në këto dy vite.
Teksa uron Taulant Ballën për postin e ri, Çuçi shkruan se që prej ditës së parë ka shërbyer me integritet për të adresuar sfidat në fushën e sigurisë.
“Falënderoj kryeministrin Rama për besimin dhe mbështetjen që më ka dhënë këto dy vite e gjysmë në detyrën e vështirë të Ministrit të Brendshëm. Për mua ka qenë nder dhe përgjegjësi e madhe të ushtroja këtë funksion të lartë publik dhe shumë të rëndësishëm.
Prej ditës së parë kur e mora atë detyrë e deri më sot kam punuar e shërbyer me integritet dhe bashkë me skuadrën e Ministrisë së Brendshme kemi adresuar shumë sfida që lidhen me sigurinë, rendin publik, emigracionin, gjendjen civile dhe pushtetin vendor.
Një falënderim i veçantë shkon për të gjithë ata që ishin krah meje në këtë rrugëtim sfidues.
Suksese Taulantit në sfiden e re, për të vijuar me reformat transformuese në këtë ministri e veçanërisht në Policinë e Shtetit”, shkruan Çuçi.
/a.r
