Gjatë ditës së djeshme mediat raportuan se dy deputetet e PDIU, Reme Lala dhe Elena Xhina braktisën këtë forcë dhe kaluan me Partinë Socialiste.

Teksa deputetja e Dibrës Lala e konfirmoi vetë përmes një fjalimi në një aktivitet ku ishte edhe kryeministri Rama, për deputeten tjetër nuk kishte asnjë konfirmim.

Ajo reagoi vetë më vonë përmes një statusi në rrjetet sociale. Xhina shkruan se vijon të jetë pjesë e PDIU.

“Meqenese mediat vazhdojnë të pasqyrojnë gjerësisht lajmin se unë kam kaluar në grupin parlamentar te PS, më duhet të sqaroj edhe një herë se nuk kam bërë asnjë lëvizje të pozicionit politik dhe jam aty ku kam qenë. Diçka të tillë e kam sqaruar edhe me anë të statusit të mëparshëm, gjithsesi për mua është e rëndësishme që situata ime politike të jetë e kuptuar qartë nga votuesit e mi të Elbasanit, të cilët janë interesi im i vërtetë!”, shkruan ajo në rrjetet sociale.