Video ku kreu i PD-së së Lushnjes, Myslym Murrizi fyente dhe ofendonte rëndë një punonjës policie, pse ky i fundit e kishte ndaluar për shkak se nuk kishte vendosur rripin e sigurisë, ka shkaktuar një furtunë të vërtetë në rrjet.
Aq sa Murrizi është detyruar që të fshijë videon të cilën në mënyrë të trashë e kishte postuar vetë në rrjet.
Murrizi është kritikuar edhe nga njerëz pranë PD-së, për gjestin e tij.
Gazetari i djathtë Alfred Lela ka bërë një shkrim për ngjarjen, ku tregon se kush është polici i sulmuar.
“Një video e hedhur në rrjet nga vetë autori i saj, Muslim Murrizi, kryetari i PD së Lushnjës, është vetëdemaskuese. Në të, Murrizi shfaqet duke e fyer dhe abuzuar hapur policin rrugor, të cilin unë e njoh dhe e di për djalë të mirë e korrekt. Ai quhet Agron Voga dhe është nga Fushë- Kruja.
Por, nuk ka rëndësi fakti se kush e njeh dhe si, një polic: Ai njeri me uniformë është të gjithë policët e Shqipërisë.
Ai është njëri prej atyre që rrinë gjithë ditën në pluhur, vapë apo shi; thithin në mushkëri dioksid karboni, dhe u duhet të durojnë edhe abuzimet e ‘muslimëve’ të kësaj shoqërie arrogante.
Dukej e rehatshme makina e Muslimit, nga druri i përpunuar ngjyrëarre që i mbështillte timonin.
Sa ç’dukej në parehati polici me emrin Agron, të cilin duke e njohur, e di se një gjak i vinte e një i shkonte dhe uniforma e pengonte që të ‘prezantohej’ siç duhej me Muslimin.
Ka shumë policë që durojnë abuzime rrugëve të Shqipërisë, nga të ngjashmit e Muslimit: Kryetarë partish dhe drejtorë partish, zëvendës ministrash dhe dashnore ministrash.
Nuk e meritojnë. Ata janë nëpunës të këtij shteti, edhe kur shteti kthehet në pushtet abuziv.
Myslim Murrizi, ndoshta ka qenë i provokuar, por ne nuk e dimë këtë, sepse në videon që ai vetë ka xhiruar, është ai në shkelje dhe askush tjetër.
Ai duhet t’i kërkojë falje policit Agron dhe të ngrejë zërin kundër shefave të tij që mund të jenë të drogës, të hurit e të litarit.
Por, nuk është e ndershme që inatin me sistemin, ministrin apo qeverinë t’a nxjerrësh me policin e parë rrugor që është duke bërë punën.
Lulzim Basha, që i ka mbledhur njerëzit në shesh për Republikën e re, edhe si ish- ministër i Brendshëm, edhe i këtij polici e të gjithë policëve, duhet të bëjë një gjest e ‘të tërheqë Muslimin’, që ne ta kuptojmë se Republika është e re dhe ‘muslimët’ e vjetër”, shkruan Lela.
