Plot 4 mijë forca policie janë angazhuar gjatë këtyre ditëve, që pas tërmetit të 26 nëntorit.
Në një deklaratë për mediat, drejtori i Policisë së Shtetit, Ardi Veliu bëri të ditur planin e masave të marra, ndërsa falenderoi të gjithë strukturat për ndihmën që kanë dhënë.
“Menjëherë pas rënies së tërmetit, Policia e Shtetit angazhoi në zonat e prekura mbi 4000 forca policie me detyra konkrete, duke nis nga:
-përfshirja në operacionet e kërkim-shpëtimit;
– dhënia e ndihmës së parë për njerëzit që kishin nevojë;
– garantimi i rendit dhe sigurisë;
– disiplinimi i qarkullimit duke i dhënë përparësi qarkullimit të ambulancave dhe ekipeve të zjarrfikëseve;
– sigurimi i pronës së qytetarëve dhe ruajtja e objekteve të dëmtuara, për të mos lejuar futjen e banorëve për shkaqe sigurie” tha Ardi Veliu
Veliu tha se në bashkëpunim edhe me skuadrat e zjarrfikëseve dhe ushtrinë u shpëtuan 39 jetë njerëzish, që kishin mbetur poshtë rrënojave.
Veliu u ndal veçanërisht te çështja e kontributit financiar të forcave policore për familjet e prekura nga tërmeti, një temë kjo që ka nxitur jo pak debat. Sipas tij, kontributi ishte vullnetar dhe jo i detyrueshëm.
“Me këtë rast, duke përfituar nga ky komunikim publik, dua të falënderoj një për një, të gjithë punonjësit e Policisë, por edhe familjet e tyre që kontribuuan me vullnet sipas mundësive duke bërë të mundur mbledhjen e shumës 104 milion e 350 mijë lekë, e cila u depozitua ne platformën e-Albania”, tha Veliu.
g.kosovari
