Byroja e Kuvendit ka përjashtuar për 10 ditë deputetin e Partisë Demokratike, Flamur Noka nga pjesëmarrja në seancat parlamentare. Shkak është bërë përplasja fizike me deputetin Erjon Brace.
Byroja e Kuvendit u mblodh me urgjencë për të diskutuar dhe vendosur ndaj deputetit të Partisë Demokratike.
Në selinë e Kuvendit ka mbërritur edhe kryeparlamentari Ilir Meta, i cili drejtoi mbledhjen e Byrosë, që u kërkua nga Partia Socialiste.
Seanca plenare e Kuvendit e nisur në orën 15:00, u ndërpre sërish pasi demokrat Noka, u fut me forcë në sallë edhe pse shërbimet e Gardës kanë tentuar të mos e lejojnë.
Kryetarja e seancës kërkoi që deputeti Flamur Noka të largohet nga salla, meqë kjo nuk u pranua Leskaj ndërpreu sërish seancën.
Pas komunikimit të vendimit, opozita ka braktisur punimet e Kuvendit.
“Ju nuk e keni konceptin e drejtësisë. Këtu nuk është problemi i përjashtimit të një deputeti, por thjeshtë tregon konceptin e qeverisë. Opozita në burg, qytetarët në burg. Edhe për një çati shtëpie, ndërsa kriminelët rrugëve. 18 Shkurtin prandaj e kemi thirrur, që t’i japim fund kësaj situate” – tha kreu i grupit demokrat, Edi Paloka.
