Policia britanike gjatë ditëve të fundit është duke goditur aktivitetet e paligjshme të shqiptarëve që jetojnë në Angli, teksa kultivimi i kanabisit në ferma është kthyer në një fenomen shqetësues.
Tre shqiptarë kanë pranuar përfshirjen e tyre në një zinxhir të rritjes së kanabisit me një vlerë prej 140 mijë paund në Blackpool dhe pas arrestimit janë dënuar nga gjykata.
Dorjan Gjana, 21 vjeç, Shkëlzen Madani, 22 vjeç, dhe Velson Neza, 32 vjeç, banues në Londër, pranuan prodhimin e kanabisit në tre fermat e ngritura në “Ribble Road”, “Ashburton Road” dhe “Westminster Road”.
Kur policia shkatërroi të mbjellat në vitin 2019, ata gjetën më shumë se 80 bimë me vlerë rreth 40,000 paund, në Rrugën “Ashburton”.
Në Ribble Road, u gjetën edhe 200 bimë kanabis me vlerë mbi 100,000 paund.
Edhe në “Westminster Road” ishte bërë gati ferma e kanabis për të rritur bimë të ngjashme.
Prokuroria tha se Neza kishte një rol më të rëndësishëm në grup, me më shumë përgjegjësi dhe lidhje me ata që ishin në krye të komplotit që po financonin dhe po drejtonin operacionin.
Të pandehurit Neza dhe Gjana u panë për herë të parë të përfshirë në 2 tetor në një furgon, duke shkarkuar shumë kuti dhe sende të tjera”.
Në Gjykatë u tha se bastisjet e policisë pasuan operacionin pas marrjes së filmimeve të kamerave të sigurisë, vëzhgimeve në terren dhe të celularëve.
Neza dhe Madani u gjetën nga policia në Rrugën “Ashburton” me çelësat për në “Westminster Road”.
Gjana u kap duke u përpjekur të ikte nga pjesa e prapme e njërës prej shtëpive.
Në telefonin e Nezës u zbulua se numrat e dy shqiptarëve të tjerë, ruheshin me emrin “punëtor”.
Gjykatësi Andrew Jefferies e dënoi 32-vjeçarin Neza me dy vjet, ndërsa Gjana dhe Madani, u dënuan me nga nëntë muaj secili, por që presin të lirohen për shkak të kryerjes së dënimit në paraburgim.
/a.r
