Nga Skënder Minxhozi/
Po të kishte qenë një rezultat i ngushtë, akuza do të ishte e rrufeshme: U vodhën! Nëse rezultati (siç doli në të vërtetë), do të ishte i thellë, sërish akuza do të ishte po aq e menjëhershme: U blenë! Pak orë pas zgjedhjeve në Dibër, skena politike vijon të ziejë nga debati për fitoren me përmasa realisht të papritura të kandidatit socialist Muharem Rama. Ngjan paradoksale, por mbi 4000 votat diferencë që ai mori ndaj Sherefedin Shehut, duket se i kanë lejuar opozitës të ngrejë zërin në kupë të qiellit për atë që ajo e quan një proces të blerë. Madje për ta bërë më të besueshme akuzën e saj, shton edhe togëfjalëshin “me para droge”.
Ekuacioni i zgjedhjeve të blera me hashash është një version që tashmë në PD duket se e merr të mirëqenë i madh e i vogël. Me një lloj gëzimi dhe çlirimi të brendshëm, që më në fund u gjet “shkaku” madhor, kurthi fatal, komploti i fshehtë, që çoi në humbje kandidatin opozitar. Aaaa, ja ku paska qenë problemi, duket sikur thotë linja zyrtare e opozitës, tani që u mor vesh se bashkia e Dibrës nuk do të ishte pikënisja e ringritjes së demokratëve, siç e njoftoi plot pompë dhe volum të lartë kryetari Lulzim Basha.
Dhe si për ta kokolepsur edhe më keq këtë lëmsh me histori subversive, një avion i vogël i rrëzuar në Ishëm, e bën edhe më të madhe bindjen autosugjestive të opozitës për mënyrën sesi Rama (Edi, jo Muharemi), po qëndron në pushtet. Aq me bindje po maiset kjo puna e manipulimit të politikës nga droga, saqë në këtë amok politik, mbeti vetëm pa u thënë që piloti italian kishte marrë përsipër të mbulonte zonën e Maqellarës apo Kalanë e Dodës, me eurot e kanabisit që do të sillte në bordin e avionit Pipper!!!
Që në Shqipëri është mbjellë e mbillet drogë, kjo s’ka pikën e dyshimit. Që kultivimi i drogave ka pasur dhe ka kopertura politike dhe institucionale, edhe kjo nuk do shumë mend. Shifrat që qarkullon ky “produkt” janë të tilla, sa nuk mund të lenë indiferent askënd. Por që edhe historia e kanabisit të mos përfundojë në mullirin e blojës së thashethemeve të përditshme që prodhon shtypi dhe politikanët e Tiranës, lidhjet duhen provuar, akuzat duhen mbështetur nga faktet dhe drejtimi i gishtit nuk duhet bërë në tym. Emrat që janë përfolur, personat që janë përfshirë nga opozita në afera droge, duhen provuar si fajtorë nga drejtësia.
Berisha dhe Basha janë dy liderë tejet të akuzuar në vite nga kundërshtarët e tyre politikë, për kundravajtje e madje edhe krime të rënda. Fajdet, shtatori 1998, 21 janari, Gërdeci, Rruga e Kombit etj, janë të gjitha përgjegjësi të kësaj dysheje, në gojën e socialisteve. Gjithsesi, për sa kohë që ndaj tyre s’ka një vendim gjykate për këto faje të supozuara, gjithçka ka mbetur në suazën e akuzave politike.
Ky parim universal vlen njëlloj edhe për ata që Basha e Berisha anatemojnë nga mëngjesi në darkë. Sepse kur publiku dëgjon Edi Ramën që thotë se është pakësuar tetë herë sipërfaqja e mbjellë me hashash në tre vitet e fundit, e kur më pas sheh akuzat me emra konkretë të opozitës ndaj të qeverisë, e ka të vështirë të gjejë se ku fillon e vërteta e ku mbarojnë thashethemet. Brenda qerthullit të të cilave ra edhe Dibra me zgjedhjet e saj, duke ndihmuar kështu humbësit që të kamuflojnë dobësinë e tyre politike e elektorale, pas “pesëfletëshit” të gjelbër që po çmend gjithë Shqipërinë.
