Ish-shefi i sektorit të krimit kundër narkotikëve në Policinë e Vlorës, Gjergji Kohila është vetëdorëzuar pasditen e sotme në drejtorinë e Tiranës.
GJKKO e ka dënuar Kohilën në fillim të muajit dhjetor me 12 vite burg, si pjesëtar i grupit të “Habilajve” që merrej me trafikun e drogës nga Shqipëria drejt Italisë.
Për shkak të gjykimit të shkurtuar, dënimi i tij është ulur nga 12 vite në 8 vite burg. Bëhet e ditur se Kohila është vetëdorëzuar në policinë e Tiranës në prani të avokatit të tij.
Kujtojmë se urdhërarrestet për Jaeld Çelën dhe dy ish-zyrtarët e tjerë të Policisë së Vlorës, Gjergji Kohila dhe Sokol Bode u lëshuan në nëntor të vitit 2017, si të përfshirë në dosjen Habilaj, ku implikohet dhe ish-ministri i Brendshëm Saimir Tahiri.
Prokuroria përmend në dosje se për kryerjen e veprimtarisë kriminale, dy vëllezërit, Moisi dhe Florian Habilaj, gjetën mbështetjen e ish-shefit të Stacionit të Policisë Kufitare të Dhërmiut, Sokol Bode, i cili mbajti këtë detyrë nga dhjetori i 2013-s deri në maj të 2016- s.
g.kosovari
