Arrestimi dhe vendimi i gjykatës greke për të dënuar me 30 muaj burg secilin nga dy shoferët e Ministrisë së Jashtme shqiptare që transportonin abetare shqip, shkaktoi irritim mes shqiptarëve, por dhe një skandal të vërtetë diplomatik midis dy vendeve.
Shumë shqiptarë, por edhe vetë Tirana zyrtare, u ndje e prekur nga vendimi i gjykatës greke, por mesa duket vetë protagonistët nuk e kanë përjetuar kështu.
Njëri nga të dënuarit, Altin Tafa, më shumë se i irrituar, duket të jetë i zhgënjyeri i madh për shkak se dashurinë e tij për Greqinë dhe flamurin bardhë e blu ai nuk ka ngurruar asnjëherë ta shprehë, shkruan ‘BW’.
Punonjësi i Ministrisë sonë të Punëve të Jashtme ka postuar në rrjetet sociale një foto duke puthur flamurin grek, disa muaj më parë.
Dhe nuk bëhet fjalë për një flamur të zakonshëm, por pikërisht atë që mban makina e ambasadores greke në Tiranë, të cilin Tafa e ka puthur pikërisht në oborrin e MPJ-së shqiptare.
Çuditërisht shoferi i dënuar tashmë nga gjykata e vendit fqinj, nuk ka postuar asnjë foto duke puthur flamurin shqiptar, ndaj dhe me të drejtë ai është i zhgënjyeri më i madh ajo që i bënë grekët, dashurinë për të cilët nuk ka ngurruar ta faktojë edhe me foto.
