Mursia është një fshat piktoresk ndërmjet Butrintit e Konispolit dhe ofron mundësi të shumta për zhvillimin e turizmit. Këtë mundësi po e shfrytëzon një çift zviceran, bashkë me mikeshën e tyre shqiptare, Mirën që kanë hapur një restorant buzë liqenit të Mursisë.
“Erdhëm në Shqipëri sepse e zbuluam atë gjatë pushimeve, na pëlqen vendi na pëlqen natyra ndaj vendosëm të investojmë këtu dhe jo në bregdet. Këtu ka një lloj turizmi special, njerëzit nuk duan vetëm vendet e mbyllura dhe të zhurmshme ata duan të ecin me biçikleta buzë liqenit apo të ngjiten në mal”, u shpreh Stefan.
Çdo ditë është një sfidë për Stefanin dhe Kristinën, të cilët u duhet të mësojnë gjuhën e zakonet shqiptare. Kristina na tregon se kanë përshtatur menynë, mes tradicionales e modernes.
“Kemi shumë ushqime internacionale, kemi karpaco me mjaltë dhe portokall. Nga kuzhina shqiptare kemi dy ushqime që pëlqehen shumë në restorant. Pulë me makarona dhe tavën me levrek”, tha Kristina.
Turistët e huaj që vizitojnë bregdetin e Sarandës janë të interesuar për të eksploruar dhe zonat përreth.
“Po kërkonim të largoheshim nga turma në bregdet dhe gjetëm këtë vend në google map. Ushqim ekselent dhe njerëz të qeshur”, thotë një turist.
Fshati Mursi i Bashkisë Konispol shtrihet në lindje të fushave të Rrahut dhe Vrinës, të cilat janë mbushura me mandarina, pranë ka liqenin dhe malin e Milesë.
/a.r
