Ministri i Financave Arben Ahmetaj ka sqaruar edhe njëherë vendosjen e biznesit të vogël në skemën e TVSH. Ai theksoi se opozita mashtron pasi kjo masë nuk ndikon aspak çmimet ndërsa thekson se gjithçka bëhet në funksion të uljes së evazionit tek të mëdhenjtë.
Sipas Ahmetaj reforma synon vjeljen e më shumë TVSH-je nga biznesi i madh.
“Nuk synohet që biznesi i vogël të jetë gjenerator i të ardhurave të biznesit. Vajtën 5 vite tashmë që kanë thirrur skenarin grek, ndërkohë ne jo vetëm që e lamë prapa, por sot jemi një nga vendet me rritjen më të lartë në rajon. Nga bizneset e vogla me TVSH arkëtohen rreth 1 mld lekë TVSH, kjo përfaqëson vetëm 0.08 % të totalit të TVSH të mbledhur.
Qëllimi të dashur miq, të dashur qytetarë, të dashur sipërmarrës është fokusi te biznesi i madh. Pra është qartësia e transaksionit në funksion të vjeljes më shumë TVSH nga biznesi i madh, ky është qëllimi. Nuk është qëllimi për të shkuar te biznesi i vogël, biznesi i vogël le të jetë me kontribut modest për buxhetin, fokusi është te buxheti i madh. 56 % e sipërmarrjessë vogël do të mbetet jashtë deklarimit, kompani që janë me xhiro nën 2 mln lekë”, deklaroi Ahmetaj.
Ahmetaj deklaroi se fokusi do të jetë pikërisht te bizneset që abuzojnë duke u hequr si të vogla por në fakt janë të mëdha nga xhiroja. Po ashtu ai tha se tatim-fitimi për biznesin e vogël ka qenë dhe do të mbetet zero./a.m.
