E përditshmja italiane sportive Tutto Sport i ka kushtuar një artikull të tërë stadiumit të ri në vend, Arenës Kombëtare, duke e cilësuar si “foleja e re” e shqiponjave të kombëtarez kuqezi. Tutto Sport e vlerëson pozitivisht porjektin për stadiumin e ri duke shtuar se do të jetë një ndër të paktit që do të qëndrojë “zgjuar” 365 ditët e vitit.
“Shqipëria është më shumë se kurrë duke rendur drejt një të ardhmeje që përveçse moderne, të jetë në gjendje që t’i përgjigjet edhe në futboll pritshmërive të një vendi të ri dhe plot pasion për sportin. Kështu, në prezantimin zyrtar të një projekti arkitektonik sa të rëndësishëm aq dhe domethënës, foli dhe Kryeministri Edi Rama, i apasionuar pas futbollit dhe supertifoz i Kombëtares, skuadrës që nën drejtimin e Gianni De Biasi-t arriti kualifikimin historik në fazën finale të Europianit 2016.
Stadiumi i ri i kryeqytetit, shtëpia e mrekullueshme e Shqipërisë, do të quhet Arena Kombëtare, do të zëvendësojë stadiumin ekzistues
“Qemal Stafa”, do të mund të mbajë 25 mijë spektatorë, do të ketë dyqane, restorante dhe një hotel, pra aty jeta do të pulsojë në të shtatë ditët e javës, përgjatë 365 ditëve të vitit.
Punimet do të përfundojnë në maj të vitit 2018. Kryeministri Rama ka deklaruar: “Kombëtarja do të ketë një stadium të nivelit europian, dhe kjo do të na mundësojë kandidimin për të mirëpritur një finale të Superkupës Europiane, ose Ligës Europiane. Federata Shqiptare e Futbollit (FSHF) do të ketë mbështetjen tonë të plotë. Dëshiroj që ky stadium të ketë një ndikim të madh edhe në pjesën tjetër të Europës. Do të jetë i hapur dhe do të funksionojë çdo ditë, si stadiumet e Juventus-it dhe të Udinese-s”, përfundon artikulli.
Artikullin në fjalë e ka postuar në rrjetin e tij social edhe kryeministri Edi Rama, teksa në mbishkrim ka hedhur një sërë duartrokitjesh për të. Javanews/ a.k
