Autoritetet në Turqi planifikojnë lirimin e afro 38 mijë personave nëpërmjet të ashtuquajturit “lirim i mbikëqyrur” për ta zbutur mbingarkesën në burgje për shkak të arrestimeve pas përpjekjes së dështuar për puç.
Ministri i drejtësisë i Turqisë, Bekir Bozdag, ka shkruar sot në rrjetin Twitter se është miratuar një dekret i qeverisë për lirim, raporton Rel.
Burgjet e Turqisë aktualisht ishin të mbipopulluara edhe para goditjes së autoriteteve turke për shkak të grushtshtetit. Pas puçit të dështuar, janë arrestuar më se 35 mijë vetë, ndërsa dhjetëra mijëra të tjerë janë larguar nga puna e tyre.
Për puçin e dështuar autoritetet e Turqisë e fajësojnë klerikun islamik, Fethullah Gulen, i cili jeton në Shtetet e Bashkuara.
Gulen e ka hedhur poshtë çfarëdo perfshirje. Gjatë puçit të dështuar më 15 korrik, janë vrarë afro 240 persona./a.m.
