Është e vështirë për tu menduar, por ka ndodhur, Presidenti turk Rexhep Taip Erdogan ka vendosur të shtyjë ndryshimin e orës, derisa të mbarojnë zgjedhjet që zhvillohen në nëntor. Kështu, ora zyrtare ka mbetur një orë prapa, pavarësisht se çdokush dhe çdo kompiuter apo celular, tashmë funksionon sic duhet, me orën diellore.
Në rrjetet sociale, shumë persona kanë filluar të ironizojnë Presidentin turk, duke pyetur se sa “ është ora” në turqi.
“Jemi të sinkronizuar me orën speciale të Erdogan, për fat të keq edhe ai mund të ndalojë kohën, por nuk mund të ndalë kohën dixhitale. Ndaj dhe jemi shumë konfuzë”-shkruan një përdorues në Facebook.
Vendimi i Erdogan, siç shpjegojnë burime zyrtare turke, është marrë për ti garantuar zgjedhësve një orë dritë më shumë ditën kur të shkojnë të votojnë në 1 nëntor. Kështu ora diellore do të hyjë në fuqi vetëm një javë pas zgjedhjeve, në 8 nëntor. Kjo nuk është hera e parë që përpara ngjarjeve të rëndësishme kombëtare, Turqia vendos të shtyjë ndryshimin e orës. Vetëm se me përhapjen kaq të madhe të smartphonëve dhe tabletëve, vendimi ka shkaktuar një kaos të vërtetë.
