Në delegacionin e biznesit që do ta shoqërojë kryeministrin grek Alexis Tsipras gjatë vizitës në Shkup, më 2 prill, do të përfshihen mbi 70 kompani të vogla dhe të mesme, publikoi agjencia greke ANA-MPA.
Delegacioni është përkrahur nga kompania greke për investime dhe tregti të jashtme “Enterprice Greece”, ndërsa kompanitë e sektorit energjetik, ndërtimtaria, prodhimet industriale, ushqimi, pijet dhe teknologjia e lartë, sipas informatave të ANA-MPA, tashmë kanë shprehur interesim për pjesëmarrje dhe kanë vlerësuar se ekziston hapësirë për investime në Maqedoninë e Veriut, lajmëroi korrespondentja e MIA-s nga Athina.
“Gjatë udhëtimit do të organizohet konferencë e biznesit për lidhshmëri, që ka për qëllim pjesëmarrësit e të dy vendeve të vijnë deri në kontakt për t’i shqyrtuar fushat e bashkëpunimit. Kompania (“Enterprice Greece”) beson në dinamikën e rajonit të Evropës Juglindore dhe organizon ngjarje që e përforcojnë bashkëpunimin dhe e promovojnë ekstraversionin e bizneseve greke”, shkruan ANA-MPA.
Agjencia greke sqaron se kompania për investime dhe tregti të jashtme “Enterprice Greece” është trup shtetëror kompetent, nën kontroll të Ministrisë së Ekonomisë dhe Zhvillimit, për tërheqje të investimeve në Greqi dhe për promovim të eksportit, “me qëllim që të promovohet vendi si destinacion investues atraktiv dhe të promovojë prodhime konkurrente eksportuese dhe shërbime në Greqi”.
/a.meta
