Paralelisht me seancën e Kuvendit, ku kryeministri Edi Rama e sulmoi opozitën duke thënë se protesta e shtyrë prej tyre të “Unaza e Re” është më e turpshmja që ka ndodhur ndër vite, PD ka zhvilluar zhvilluar një bashkëbisedimin për buxhetin 2019 me përfaqësues të biznesit, ekspertë, gazetarë e grupe interesi.
Në fjalën e tij, kryedemokrati Lulzim Basha akuzoi qeverinë për karakterin kriminal sipas tij të Buxhetit 2019, që do të votohet sot në Parlament.
Basha tha se rritja e borxhit dhe koncesionet kanë sjellë një faturë të tmerrshme për ekonominë shqiptare, ndërsa Rama po e ndan pasurinë me oligarkët.
“Opozita do bëjë publik buxhetin që vjedh dhe zhvat taksat e shqiptarëve. Dhënia e koncesioneve 10 oligarkëve. Rritja e borxhit dhe koncesionet kanë sjellë një faturë të tmerrshme për spektrorët e ekonomisë. Shqipëria ka nevojë për një buxhet realist që të ndalë largimin masiv të shqiptarëve, pasi 1 në 6 shqiptarë po largohet nga vendi”, deklaroi Basha.
Ndërkohë deputetja e PD, Jorida Tabaku tha se prioritet i kësaj qeverie është pastrimi i parave dhe koncesionet për benjaminët e Ramës.
“Ku kanë shkuar të gjithë taksat e rritura të Ramës? Nuk ka shkuar as në bujqësi as në shëndetësi, por për pasurimin e oligarkëve. Kemi bërë mbi 100 amendamente. Sot Kuvendi thotë se opozita nuk bën propozime. Me këtë buxhet që ka harruar duket sikur është buxheti i fundit i Rilindjes. Unaza e Tiranës me 40 mln euro për 2 kilometra. Prioritet është pastrimi i parave dhe koncesionet për oligarkët”- tha Tabaku
