Unioni Kristian-demokrate gjermane, CDU ka kundërshtuar kategorikisht idenë e ministres së Jashtme gjermane, Annalena Baerbock për të dërgimin e ushtarëve gjermanë në Ukrainë. Kandidati i CDU për Kancelar të Gjermanisë, Friedrich Merz ka kritikuar ashpër idenë e Ministres së Jashtme për përdorimin e Bundeswehr-it për të siguruar paqen në Ukrainë në rast të një armëpushimi. Kreu i CDU tha për mediat gjermane se i konsideron spekulime të tilla si të papërgjegjshme në këtë moment.
“Askush nuk po e bën këtë pyetje për momentin”, theksoi Merz. “Ne të gjithë po luftojmë me pyetjen se si t’i japim fund kësaj lufte”, tha ai.
Anëtari i Bundestagut nën logon e CDU dhe eksperti i politikës së jashtme të CDU, Norbert Röttgen kritikoi deklaratat e Baerbock si “të pamenduara”.
“Deklaratat e saj janë shenja të politikës së rreme të sigurisë të qeverisë federale. Unë nuk e kuptoj këtë bisedë të nxituar dhe të pakujdesshme për operacionet ushtarake gjermane dhe evropiane. Baerbock nuk merr parasysh sa duhet rrethanat e vështira gjeopolitike midis Ukrainës dhe Rusisë. A e di zonja Baerbock për çfarë po flet? Me një kufi tokësor dhe detar midis Ukrainës dhe Rusisë që është mbi 2000 kilometra i gjatë?”, tha Norbert Röttgen i CDU.
Komisionerja ushtarake Eva Högl gjithashtu kundërshtoi propozimin e Baerbock.
“Aktualisht nuk ka asnjë bazë për një mision paqeje dhe vendosjen e trupave tokësore të NATO-s. Prandaj, nuk është e përshtatshme në këtë pikë të spekulohet për përfshirjen e mundshme të Bundeswehr-it, detyra aktuale e Bundeswehr-it është të vazhdojë t’i ofrojë Ukrainës mbështetjen më të mirë të mundshme me materiale dhe trajnime në mënyrë që të përmirësojë shanset e Ukrainës për fitore”, tha komisionerja ushtarake Eva Högl.
Ministrja e jashtme gjermane, Baerbock tha të martën në Bruksel, se po diskutoheshin elementë të ndryshëm të paqes në Ukrainë.
E pyetur për një rol të mundshëm të Gjermanisë në këtë pikë, ajo tha se pala gjermane sigurisht që do të mbështeste gjithçka që do t’i shërbente paqes në të ardhmen me të gjitha forcat. Ajo nuk përjashtoi përfshirjen e Bundeswehr-it.
