Presidenti i Shteteve të Bashkuara të Amerikës, Donald Trump, ka thënë se nuk ka qenë në dijeni për një pagesë prej 130.000 dollarësh amerikanë që avokati i tij personal ia ka bërë një aktoreje të filmave pornografikë – e cila thotë se ka pasur një lidhje intime me të.
I pyetur nëse ka qenë i informuar për pagesën që i është bërë Stormy Daniels, Trump ka thënë “jo”, raporton CNN.
Trump ka folur para gazetarëve, të enjten, në bordin e avionit presidencial, Air Force One.
I pari i Amerikës ka thënë se nuk e di përse avokati i tij shumëvjeçar, Michael Cohen, e ka bërë këtë pagesë, apo se ku i ka marrë ai paratë.
Daniels thotë se ka bërë seks me presidentin në vitin 2006, dhe se është paguar si pjesë e një marrëveshjeje për të heshtur rreth rastit – të cilën ajo po përpiqet ta shfuqizojë.
Përfaqësuesit e presidentit më herët kanë mohuar se Trump dhe Daniels kanë qenë dashnorë, përgatiti ”Express”. (b.an)
