Presidenti sirian Ahmed al-Sharaa do të zhvillojë bisedime me presidentin amerikan në Shtëpinë e Bardhë sot, 10 nëntor, pak më shumë se 1 vit pas rrëzimit të regjimit të gjatë të familjes Assad. Kjo është vizita e parë e një presidenti sirian në SHBA që nga pavarësia e vendit në 1946.
Sharaa u largua nga lista e zezë e terrorizmit e SHBA-ve dhe Washingtoni hoqi sanksionet kundër tij, duke hapur rrugën për të kërkuar mbështetje për rindërtimin e Sirisë. Ai mund të nënshkruajë gjithashtu një marrëveshje për t’iu bashkuar koalicionit ndërkombëtar kundër ISIS-it, për të forcuar sigurinë në një vend të mbushur me armë dhe tensione.
Në intervistë për FRANCE 24, ekspertja për Lindjen e Mesme, Roula Merhej, tha se qëllimi kryesor i Sharaa është heqja e sanksioneve ndërkombëtare dhe fillimi i rindërtimit ekonomik pa pengesa, lufta kundër terrorizmit dhe ratifikimi i Sirisë në koalicionin kundër ISIS-it.
SHBA kërkon në këmbim që Siria të bashkohet me Marrëveshjet e Abrahamit, të largojë grupet e huaja terroriste dhe të garantojë një stabilitet afatgjatë në vend. Presidentit sirian mund t’i duhet të pranojë edhe njohjen e aneksimit izraelit në pjesë të Golanit për të siguruar ndihmën ekonomike dhe integrimin ndërkombëtar.
Ekonomikisht, rindërtimi i Sirisë mund të kapë vlerën e 216 miliardë dollarëve, me pjesëmarrje të firmave nga Emiratet Arabe, Franca, Katari, Turqia dhe SHBA-të. Siria do të mbetet e varur ekonomikisht nga këto partnerë për 5-6 vitet e ardhshme.
Sa i përket Rusisë, marrëveshja për bazën detare në Tartus është anuluar nga autoritetet e reja, ndërsa Sharaa ka kërkuar gjithashtu kthimin e fondeve të përvetësuara nga regjimi i kaluar.
Gjatë vizitës së al-Sharaa pritet të trajtohet gjithashtu çështja e marrëdhënieve me Izraelin duke synuar një stabilizim të rajonit dhe mundësi për investime të huaja.
Po çfarë janë Marrëveshjet e Abrahamit?
Marrëveshjet e Abrahamit janë një seri marrëveshjesh historike paqësore, të ndërmjetësuara nga SHBA-të, që synojnë normalizimin e marrëdhënieve midis Izraelit dhe disa vendeve arabe, duke përfshirë Emiratet e Bashkuara Arabe, Bahreinin, Marokun dhe Sudanin. Këto marrëveshje fokusohen në bashkëpunim ekonomik, tregtar dhe diplomatik, si dhe në përmirësimin e sigurisë në rajon.
Synimi i SHBA-ve me vizitën e al-Shaara është që Siria, pas rrëzimit të regjimit Assad dhe me një qeveri të re, të bashkohet në këtë kuadër. Përfshirja e Sirisë në Abraham Accords do të hapte rrugën për investime të huaja, ndihmë ekonomike dhe stabilitet rajonal, duke e integruar vendin në arenën ndërkombëtare pas një periudhe të gjatë konflikti dhe sanksionesh.
