Ish-Presidenti Donald Trump pritet të merret në pyetje nga Prokurorja e Përgjithshme e New Yorkut, Letitia James të mërkurën, raporton CNN. Veprimet e fundit të FBI-së me kontrollin e një prej vilave të ish-presidentit, duket se i kanë dhënë një pikë kthese vendimtare një hetimi civil të nisur mbi praktikat e tij të biznesit.
Është e paqartë nëse Trump do t’u përgjigjet pyetjeve apo do të pohojë të drejtën e tij të Amendamentit të Pestë kundër vetë-inkriminimit gjatë dëshmisë pas dyerve të mbyllura.
Trump tha në një postim në Truth Social të mërkurën herët në mëngjes se ai do të “takohej” me James për atë që e cilësoi si një “vazhdim të gjuetisë më të madhe të shtrigave në historinë e SHBA-së”!
“Kompania ime e madhe dhe unë, po sulmohemi nga të gjitha anët. Republika e Bananeve!”, shkroi Trump.
Deponimi vjen gjatë një jave të jashtëzakonshme ligjore për ish-Presidentin. Të hënën, FBI ekzekutoi një urdhër kontrolli në Mar-a-Lago , rezidenca e tij kryesore në Florida, në lidhje me një hetim për trajtimin e dokumenteve të klasifikuara. Të martën, një gjykatë federale e apelit mohoi përpjekjen e tij të gjatë për të bllokuar një komitet të Dhomës së Përfaqësuesve nga marrja e deklaratave të tij tatimore.
Disa këshilltarë të Trump kanë mbrojtur idenë që ish-Presidenti t’u përgjigjet pyetjeve në lidhje me pasqyrat e tij financiare nën betim, ndërsa të tjerë e kanë paralajmëruar atë të mos japë ndonjë përgjigje për shkak të rrezikut të mundshëm ligjor me të cilin mund të përballet.
Dy hetime penale po vazhdojnë: një për ndërhyrje të mundshme në zgjedhje dhe një tjetër për krime të dyshuara financiare, raporton BBC.
Ndërkohë, një hetim politik po vazhdon rreth akuzave penale për rolin e tij në sulmin e Kongresit më 6 janar të vitit 2021.
Ndërsa Trump mendon të rikandidojë për president në vitin 2024, këto rastet ligjore mund t’i japin fund ambicive të ish- presidentit.
Të dhënat e Shtëpisë së Bardhë
Kur Trump u largua nga Shtëpia e Bardhë, ai mori shumë dokumente me vete në resortin Mar-a-Lago në Florida.
Sipas ligjit të të dhënave presidenciale, marrja e dokumenteve zyrtare mund të përbëjë vepër penale.
Avokatja e tij, Christina Bobb, i tha NBC Neës se disa letra ishin sekuestruar, megjithatë FBI dhe departamenti i drejtësisë ende nuk kanë komentuar.
Në muajin shkurt, Arkivi Kombëtar tha se kishte marrë 15 kuti me letra në Mar-a-Lago, të cilat Trumpi duhet t’i kishte dorëzuar kur u largua nga Shtëpia e Bardhë.
Agjencia më vonë i tha Kongresit se kutitë përfshinin artikuj të shënuar si “informacion i klasifikuar” të sigurisë kombëtare.
Por Trump pretendoi se qeveria nuk gjeti asgjë dhe se demokratët ishin thjesht në kërkim të mashtrimit të tyre të ardhshëm.
“Mbajtja e të dhënave u mundëson presidentëve të mbahen përgjegjës për veprimet e tyre në detyrë”, thotë historiani presidencial Lindsay Chervinsky.
Por zbatimi i aktit të Regjistrimeve Presidenciale është “i ndërlikuar”, thotë ajo, sepse ligji kërkon “vullnetin e mirë” të presidentëve për të ruajtur të dhënat e tyre.
6 janari në Capitol Hill
Trump akuzohet për nxitjen e një “kryengritjeje” kur mbështetësit plaçkitën ndërtesën e Kapitolit, ndërsa anëtarët e Kongresit certifikuan fitoren zgjedhore të Joe Biden më 6 janar të vitit 2021.
Për javë më parë, ai bëri pretendime të pabaza për mashtrime zgjedhore, të cilat i përsëriti në një tubim në National Mall në Uashington DC pak para trazirave.
Menjëherë pas kësaj, Trump u shpall i pafajshëm në një gjyq politik në Senatin e kontrolluar nga republikanët dhe mbështetësit shpallën fitoren. Por kjo nuk ishte fundi i saj.
Në korrik të vitit të kaluar, demokratë dhe disa politikanë republikanë formuan një komitet të 6 janarit, i cili po shqyrton në detaje veprimet e Trumpit. Ajo ka marrë mijëra komunikime të bëra nga dhe në Shtëpinë e Bardhë, ndërkohë që hetimet po vijojnë ende.
Deri më tani, seancat dëgjimore publike të komitetit kanë gjeneruar një sërë akuzash, duke përfshirë dëshminë e ndihmësve dhe këshilltarëve të vetë Trumpit se ai e dinte se pretendimet për mashtrim zgjedhor ishin të pavërteta – dhe se hapat që po ndërmerr për të përmbysur rezultatet ishin të paligjshme.
