Amerika po mbyll Agjencinë e saj për Zhvillimin Ndërkombëtar, apo USAID, siç njihet ndryshe. Kjo erdhi pas një sulmi verbal nga Elon Musk, që është angazhuar nga presidenti Donald Trump në drejtim të Departamentit për Efiçencë Qeveritare. Miliarderi e krahason USAID-in me një mollë jo vetëm të kalbur, por edhe që nuk mund të shërohet më dhe thekson se kreu i Shtëpisë së Bardhë është pajtuar për mbylljen e agjencisë.
“Ajo çfarë kemi këtu nuk është një mollë me një krimb në të, por në fakt kemi një top me krimba. Nëse ke një mollë të prishur kërkon që ta nxjerrësh krimbin jashtë, por nëse ajo është plot me krima, atëherë nuk mund të shpëtohet. USAID është një top me krimba. Nuk ka fare mollë aty. Dhe kur nuk ka asgjë për të kafshuar atëherë duhet hequr qafe e gjitha. USAID është një organizatë kriminale”, tha Elon Musk, Drejtues i Departamentit për Efiçencë Qeveritare.
Megjithatë presidenti ende nuk e ka vulosur mbylljen përfundimtare, por sulmoi drejtuesit duke thënë se janë nga e majta radikale.
“Është udhëhequr nga një tufë lunatikësh radikalë dhe ne po i heqim ata. USAID është drejtuar nga lunatikët radikalë dhe ne po i heqim ata nga puna. Më pas do të marrim një vendim”, tha Trump.
E teksa vendimi nuk është marrë, punonjësve të selisë qendrore të USAID-it në Uashington u është dërguar një email në orët e para të së hënës duke u kërkuar që të mos paraqiten në zyrë. Kështu raporton CNN duke saktësuar se shumicës i është kërkuar angazhim nga shtëpia dhe aty të domosdoshëm nga zyra.
Sinjalet për mbylljen e mundshme të agjencisë humanitare amerikane nisën të shfaqeshin që prej javës së kaluar, me heqjen e shumë publikimeve për punën e USAID-it përreth botës. Një gjë e tillë ka ndodhur edhe në uebsajtin e Ambasadës Amerikane në Shqipëri, ku tashmë është fshirë e gjithë përmbajtja lidhur me USAID-in. (A2 Televizion)
