Donald Trump ka thënë se nëse do të bëhet president i Shteteve të Bashkuara të Amerikës, do të aplikojë “kontrollimin ekstrem” të emigrantëve.
Në një fjalim në Ohajo, kandidati republikan ka prezantuar planet e tij për të luftuar ekstremizmin islamik, përfshirë një skanim të ri për ardhacakët në SHBA, raporton BBC.
Sipas planit të Trumpit, aplikuesit do të testohen për të parë nëse ata janë në vijë me vlerat liberale perëndimore, siç është toleranca fetare, transmeton Gazeta Express.
Qytetarëve nga disa vende nuk do t’u lëshohen viza, sipas planit të Trumpit, por nuk dihet se cilat shtete do të përfshihen në listën e zezë.
Miliarderi nga Nju-Jorku po ashtu është zotuar se do të bashkëpunojë me cilindo vend që është i gatshëm të ndihmojë për të mposhtur të ashtuquajturin Shteti Islamik (ISIS).
Trump ka ndryshuar planin e tij përgjatë fushatës, pasi fillimisht kishte propozuar ndalimin e hyrjes në SHBA për të gjithë myslimanët pa përjashtim. (b.an)
