“Do të përmbahem nga komentimi mbi këto deklarata, përveçse për të konfirmuar se jemi shumë krenarë dhe mirënjohës që kemi udhëheqës të shkëlqyer, duke filluar me udhëheqësen e këtij institucioni, Presidenten e Komisionit Evropian Ursula von der Leyen. Jemi vërtet krenarë për ata që na udhëheqin në adresimin e shumë sfidave me të cilat përballet bota.”
Kështu deklaroi zëdhënësja e Komisionit Evropian Paula Pinho, e pyetur në konferencën e përditshme për shtyp në lidhje me sulmet e Trump se BE-ja është një grup kombesh në rënie të udhëhequra nga njerëz të dobët.
“Ndjenja e miliona evropianëve është e qartë: ne jemi krenarë për udhëheqësit tanë. Ne kemi shumë udhëheqës të tjerë në krye të 27 Shteteve Anëtare që janë pjesë e këtij projekti evropian, këtij projekti paqeje dhe që po e udhëheqin Unionin me vendosmëri përballë të gjitha vështirësive që po përjetojmë, brenda dhe përtej fqinjësisë sonë. Në vitet e fundit, jemi përballur me një numër të madh sfidash: nga lufta që përfshin fqinjin tonë, Ukrainën, deri te kriza energjitike që e ndjemë kaq fort dhe të cilën arritëm ta kapërcejmë së bashku.”, shtoi ajo.
Këshilltari i Putinit: Presidenti i SHBA po thotë të vërtetën për evropianët
Donald Trump po thotë të vërtetën për udhëheqësit evropianë. Kështu deklaroi Kirill Dmitriev, këshilltari presidencial rus për investimet e huaja dhe negociatori me Shtetet e Bashkuara, në një postim në rrjetin social X në lidhje me intervistën e presidentit amerikan me Politico.
Dmitriev citon konkretisht disa nga deklaratat e Trump, duke përfshirë: “Mendoj se ata janë të dobët, por gjithashtu mendoj se ata duan të jenë politikisht korrektë… Evropa nuk di çfarë të bëjë”.
Në intervistë, shefi i Shtëpisë së Bardhë tha gjithashtu se për Ukrainën, evropianët “flasin, por nuk prodhojnë (rezultate) dhe lufta thjesht vazhdon”.
