Shtëpia e Bardhë njoftoi të dielën vonë se presidenti Donald Trump kishte falur disa anëtarë të ekipit ligjor të fushatës së tij të vitit 2020, përfshirë Rudy Giuliani, Kenneth Chesebro dhe Sydney Powell, për përfshirjen e tyre në një skemë për të ndryshuar listat e zgjedhësve të zgjedhur nga shtetet që votuan kundër kandidatit republikan në zgjedhjet presidenciale të atij viti.
Një deklaratë me emrat e 77 personave të falur u publikua në rrjetet sociale në orën 22:54 (sipas orës lokale). Lista përfshinte amerikanë që morën pjesë si pjesëtarë të listave të zgjedhësve të rremë, të cilët kishin për qëllim të zëvendësonin elektoratin e zgjedhur ligjërisht, të cilët ishin të detyruar të jepnin votat e shteteve të tyre në Kolegjiumin Elektoral për Joe Biden, pasi demokratët fituan shtete si Georgia, Arizona dhe Michigan në zgjedhjet e përgjithshme.
Kjo skemë, siç shkruan The Independent, e mbështetur nga nivelet më të larta të administratës Trump, çoi në përpjekjen e mbështetësve të tij për të ndaluar certifikimin e zgjedhjeve më 6 janar 2021, një demonstratë politike që u shndërrua në një turmë të dhunshme që sulmoi Kapitolin e SHBA-ve për disa orë.
Deklarata e së dielës theksoi se faljet u zgjeruan edhe për anëtarë të administratës dhe fushatës së Trumpit që u identifikuan në hetimet për 6 janarin si ndërmjetësues mes botës MAGA dhe aktivistëve konservatorë apo ligjvënësve shtetërorë që mbështetën përpjekjet e presidentit, përfshirë shefin e tij të stafit, Mark Meadows.
Megjithatë, një rresht në fund të deklaratës theksonte qartë se një person nuk ishte falur për këtë skemë: vetë presidenti Donald J. Trump.
Koha e publikimit të lajmit dukej se synonte të fshihej në ciklin mediatik të mbylljes së qeverisë, pasi vetëm disa minuta më parë Senati kishte votuar për të zhbllokuar një rezolutë që i jepte fund një mbylljeje 40-ditore të qeverisë.
Përveç skemës së “zgjedhësve të rremë”, anëtarët e ekipit ligjor të fushatës së Trump-it morën pjesë edhe në përpjekje më tradicionale për të sfiduar rezultatet e zgjedhjeve të vitit 2020, përmes padive të shumta të udhëhequra nga Giuliani, Jenna Ellis dhe të tjerë.
Rudy Giuliani, fytyra publike e ekipit ligjor të Trump-it në vitin 2020, përfundoi në turp profesional dhe personal për shkak të veprimeve të tij. Duke u dukur i pakujdesshëm, i hutuar dhe herë pas here i paaftë gjatë prezantimit të çështjes së presidentit, ish-kryebashkiaku i New York-ut, i njohur si “Kryebashkiak i Amerikës” pas menaxhimit të qytetit gjatë sulmeve terroriste të 11 shtatorit, përfundoi duke iu ndaluar ushtrimi i profesionit të avokatit në Washington D.C. dhe New York pasi gjithçka mbaroi.
