Italia është tronditur nga një ngjarje tragjike. Në një lagje të Napolit një infermier ka vrarë 4 persona, ndërsa 5 të tjerë u plagosën.
Gjithçka ka nisur pas një mosmarrëveshjeje me të vëllain dhe bashkëshorten e tij, ku 48-vjeçari Giulio Murolo, infermier në spitalin Cardarelli, hapi zjarr duke vrarë vëllain, kunatën, më pas një efektiv të policisë bashkiake dhe një kalimtar, i cili po udhëtonte me motor para banesës së autorit, në momentin kur ndodhi ngjarja.
Sipas dëshmisë së kolegëve të tij, 48 vjeçari njihej si një person i mbyllur në vetvete, por që asnjëherë nuk kishte treguar shenja agresiviteti.
Sipas shefit të Policisë së Napolit, Giulio Murolo, një i apasionuar pas gjuetisë, ka ekzekutuar fillimisht kunatën dhe vëllain e tij, brenda ndërtesës dy katëshe ku banonte, ndërsa më pas infermieri zuri pozicion në ballkonin e banesës dhe filloi të qëllonte mbi kalimtarët e rastit.
Pas mbërritjes së forcave të policisë, Murolo nuk ka bërë rezistencë ndërsa u dorëzua, por u ndesh me zemërimin e dhjetëra personave që u mblodhën pas arrestimit të tij. Kryebashkiaku i Napolit, Luigi de Magistris, e shpalli një ditë zie.
