Detaje të reja dalin në dritë nga arrestimi i Gentian Kllogjrit dhe Thanas Thomës në Elbasan, të dy të akuzuar për vendosjen e tritolit në dy ngjarje të ndryshme. Policia ka arritur t’i identifikojë ata pas vëzhgimit të kamerave të sigurisë në të dyja vendngjarjet.
Ata akuzohen se në 6 maj vendosën një sasi tritoli poshtë një automjeti në Lagjen “Luigj Gurakuqi”, ndërsa në 22 maj vendosën lëndë plasëse në shkallët e një lokali në lagjen “Emin Matraxhiu”. Burime të prokurorisë bëjnë me dije se kanë dyshime se qëllimi i vendosjes së tritolit ka qenë paralajmërimi. Autorët e vendosjes së tritolit prej 15 vitesh jetojnë në emigracion e ktheheshin herë pas here. Ata njihen si persona me precedentë penale.
Burime të prokurorisë bëjnë me dije për BalkanWeb se dy 38-vjeçarët frekuentonin shoqëri të përbashkët me dy pronarët e lokaleve, e bëhet fjalë gjithashtu për persona me probleme me drejtësinë. Këtu janë përqendruar edhe hetimet, për të mësuar nëse vendosja e tritolit është bërë e porositur, apo ka qenë konflikt i drejtpërdrejtë mes palëve. Mësohet gjithashtu se edhe pronari i automjetit ka në pronësi një lokal në Elbasan, ashtu si Besnik Braka, i njohur ndryshe edhe si Nik Vojaçek i dënuar edhe më herët. /ma.me