I dëmtuan mobilerinë me tritol, pronarja mohon të ketë konflikte. Fushë-Kruja është tronditur nga një shpërthim i fuqishëm tritoli, që ishte vendosur në një mobilieri.
Ngjarja ka ndodhur mbrëmjen e së mërkurës, rreth orës 23:55, në mobilierinë e shtetases Dhurata Karaj. Fatmirësisht, si pasojë e shpërthimit nuk raportohen të lënduar, ndërsa janë regjistruar dëme materiale.
Menjëherë në vendin e ngjarjes shkuan forca të shumta policie, që nisën hetimet për zbardhjen e motivit të vendosjes së lëndës plasëse dhe identifikuar autorët. Sipas Policisë, lënda plasëse ishte vendosur në derën kryesore të objektit disakatësh, duke shkatërruar komplet pjesën e vetratës së xhamit.
Shpërthimi ka shkaktuar panik te banorët e zonës, të cilët dolën menjëherë nga shtëpitë e tyre për të parë se çfarë kishte ndodhur. Policia ka nisur hetimet, duke shoqëruar në Komisariat për të pyetur disa persona, mes tyre të dyshuar, nga ata që mund të kenë dijeni për ngjarjen, pronaren dhe familjarët e saj.
Por, pasi janë marrë në pyetje, nuk rezulton asnjë person i ndaluar si përgjegjës për shpërthimin e ndodhur në mobilierinë e Dhurata Karaj. Kjo e fundit ka pohuar se nuk ka dijeni se kush mund të jenë autorët dhe nuk ka asnjë ide përse mobilieria e saj. Sipas saj, nuk ka probleme dhe konflikte me persona të tjerë, as ajo dhe as familja e saj.
“Nuk kam asnjë konflikt. As unë dhe as familja ime. Ky është një biznes familjar dhe nuk kemi asnjë ide përse autorët që rezultojnë persona të paidentifikuar ta kenë sulmuar, duke vënë lëndë plasëse. Nuk kemi pasur asnjë kërcënim”, ka thënë ndër të tjera pronarja e mobilierisë.
Shpërthimi i fundit regjistron të tetin brenda këtij viti në Rrethin e Krujës, ku objektiv ishin biznese, banesa, automjete dhe shtyllat e tensionit të lartë. Në asnjë rast Policia nuk ka vënë në pranga ndonjë prej autorëve.
Prej disa vitesh, ngjarje të tilla janë kthyer në modë në Rrethin e Krujës, ndërsa vetëm në dhjetë vitet e fundit numërohen të paktën 100 raste shpërthimesh me lëndë plasëse. Në asnjë rast, Policia nuk ka vënë në pranga si autorë të vendosjes se lëndëve plasëse, duke bërë që të tetë ngjarjet të mbeten të pazbuluara.
g.kosovari
