Policia e Tiranës ka shoqëruar në cilësinë e të dyshuarit ish-bashkëshortin e tregtares Bruneta Aliaj (Meço), të cilës i vendosën eksploziv në makinë mbrëmjen e djeshme.
Pavarësisht dëshmisë që ka dhënë në polici pas ngjarjes pronarja e mjetit të dëmtuar nga shpërthimi, ish-bashkëshorti i saj pretendon se nuk ka asnjë lloj konflikti apo mosmarrëveshje me të, shkruan “Panorama”.
Burimet thanë se Edmond Meço është shoqëruar pas dyshimeve të ngritura nga ish-bashkëshortja, Bruneta Aliaj (Meço), megjithatë është lënë lirë sapo ka dhënë deklarimet e tij.
Të njëjtat burime thanë se ai ka mohuar të ketë lidhje me ngjarjen dhe nuk kishte arsye përse të sulmonte ish-bashkëshorten, në këtë formë, apo në ndonjë formë tjetër. Por, veç deklarimeve mohuese të tij, policia nuk ka gjetur as prova që ta lidhë atë më ngjarjen.
“Nuk kam asnjë lloj mosmarrëveshjeje me ish-gruan. Nuk kam asnjë lidhje me ngjarjen dhe as arsye për ta sulmuar në çfarëdolloj forme, aq më pak në atë mënyrë”, mësohet të këtë thënë në polici Meço.
Ndërsa ka konfirmuar se konflikti i vetëm që ka pasur me të ka qenë disa kohë para divorcit dhe kjo për shkak se ai nuk pranonte që të ndahej dhe se nuk ishte dakord me padinë e saj për t’u divorcuar. Por pas atij momenti, nuk ka pasur të bëjë më me të.
NGJARJA
Burime nga Policia thanë për “Panorama” se pronarja e mjetit “Smart” që u dëmtua nga shpërthimi i 100 gram tritol, ka deklaruar se nuk ka probleme me njeri.
Ajo merret me tregti dhe ka një dyqan rrobash në afërsi të Tregut Elektrik. Ndërsa prej disa vitesh jeton e vetme në një pallat pranë Prokurorisë së Përgjithshme, në Tiranë, ku ndodhi edhe shpërthimi.
Mësohet se 55-vjeçarja është nënë e dy fëmijëve, një vajze që është e martuar dhe e një djali 27-vjeçar që jeton në Britaninë e Madhe prej disa vitesh.
Ajo ka deklaruar se është divorcuar nga i shoqi prej më shumë se 5 vitesh dhe sipas saj, përveç mosmarrëveshjeve që ka pasur me të nuk ka probleme me persona të tjerë.
Kjo ka qenë arsyeja e shoqërimit të Edmond Meços në Polici, i cili pasi ka dhënë deklarime është lënë sërish i lirë.
Burimet thanë se ai ka mohuar të ketë lidhje me ngjarjen dhe nuk kishte arsye përse të sulmonte ish-bashkëshorten, në këtë formë apo në ndonjë formë tjetër.
Shpërthimi i fuqishëm ndodhi mbrëmjen e djeshme pas 9-katësheve ku ishte parkuar makina tip “Smart”.
Burimet thanë se persona ende të paidentifikuar kanë hedhur poshtë makinës, në pjesën e pasme të saj një sasi prej 100 gram tritol, që është aktivizuar me fitil zjarrpërcjellës./a.m.
